عیدالاضحیٰ کے موقع پر مسلمانوں کو قربانی کا اہم فریضہ ادا کرنے کی اجازت دی جائے جمعیۃ علماء نے وزیر اعلی سمیت دیگر وزراء کو کیا مکتوب روانہ
ممبئی،4؍جولائی(ایس او نیوز؍پریس ریلیز) مسلمانوں کا اہم مذہبی تہوار عیدالاضحیٰ کو شرعی طور پر ادا کرنے کی اجازت دیئے جانے کے تعلق سے جمعیۃ علماء مہاراشٹر (ارشد مدنی) نے چیف منسٹر آف مہاراشٹرادھو ٹھاکرے، ہوم منسٹر انیل دیشمکھ، وزیر اقلیتی بہبود نواب ملک اور کمشنر آف ممبئی میونسپل کارپوریشن کو خطوط روانہ کئے ہیں۔
جمعیۃ علماء مہاراشٹر کے دفتر سے جاری بیان کے مطابق جمعیۃ علماء قانونی امداد کمیٹی کے سربراہ گلزار اعظمی نے وزیر اعلی مہاراشٹر ادھو ٹھاکرے سے درخواست کی ہے کہ وہ دیونار سلاؤٹر ہاؤس سمیت ریاست کے عارضی مذبح خانوں میں عیدالاضحیٰ کے موقع پر مسلمانوں کو بکرے اور بڑے کے جانوروں (اجازت شدہ) کی قربانی کرنے کی اجازت دیں نیز وہ اس تعلق سے متعلقہ محکموں کے افسران کو حکم جاری کریں کہ قربانی کے لئے سلاؤٹر ہاؤسیس کو تیار کریں جیسا کہ حسب سابق ہوتا رہا ہے۔
مکتوب میں لکھا ہے کہ حال ہی میں سپریم کورٹ آف انڈیا نے جگناتھ یاترا کے لیئے مشروط اجازت دی ہے، لہٰذا اگر حکومت کو لگتا ہے کہ کرونا وباء کی وجہ سے قربانی کی اجازت دینے سے مسائل بڑھ سکتے ہیں تو وہ جگناتھ یاترا کی طرز پر مسلمانوں کو قربانی کی اجازت دے سکتی ہے۔
مکتوب میں مزید لکھا ہے کہ اسلام میں قربانی کا کوئی بدل نہیں ہے، جس بھی مسلمان پر قربانی واجب ہے اسے ہر حال میں یہ فریضہ ادا کرنا ہوگا۔ لہٰذا ان سب باتوں کو مدنظر رکھتے ہوئے مسلمانوں کو عیدالاضحیٰ کے موقع پر حسب سابق قربانی کرنے کی اجازت دی جائے۔
مکتوب میں یہ بھی لکھا ہے کہ یہ روایت رہی ہے کہ عیدالاضحی سے قبل وزیر اعلی مسلم نمائندوں کی میٹنگ طلب کرکے بی ایم سی اور حکومت کے نمائندوں کی موجودگی میں ان کے مسائل حل کیا کرتے تھے لہٰذا وزیر اعلی سے درخواست ہے کہ وہ مسلم نمائندوں کی میٹنگ طلب کرکے قربانی کا فریضہ انجام دیئے جانے کے لیے راہ ہموار کریں۔
اس ضمن میں گلزار اعظمی نے بتایا کہ انہوں نے بی ایم سی اور منترالیہ سے اپنے ذرائع سے معلومات حاصل کی تو انہیں پتہ چلا کہ عیدالاضحیٰ پر قربانی کو لیکر ابھی تک حکومت کی جانب سے کوئی فیصلہ نہیں کیا گیا ہے اور اس تعلق سے ممبئی کے سب سے بڑے مذبح خانہ دیونار میں کسی بھی طرح کی تیاری شروع نہیں ہوئی ہے، جس کی وجہ سے مسلمانوں میں بے چینی بڑھ رہی ہے۔ لہٰذا انہوں نے وزیر اعلی مہاراشٹر سمیت دیگر وزراء اورکمشنر آف ممبئی کارپویشن کو مکتوب روانہ کیا ہے۔