کیا کانگریس نے بنایا ہے بی جے پی کے ناراض خیمے سے فائدہ اٹھانے کا منصوبہ ؟
بینگلورو ، 20 / مارچ (ایس او نیوز)ریاست میں ہو رہی سیاسی ہلچل کے پس منظر میں سمجھا جا رہا ہے کہ اسمبلی الیکشن کی طرح اس مرتبہ پارلیمانی الیکشن میں بھی کانگریس پارٹی نے بی جے پی کے ناراض خیمے سے پورا فائدہ اٹھانے کا منصوبہ بنا لیا ہے ۔
سیاسی جانکاروں کا کہنا ہے کہ پارلیمانی الیکشن کے قریب آتے ہی سدانند گوڈا، رینوکاچاریہ، سنگنّا ریڈّی، جے ایس مادھو سوامی سمیت کئی ناراض بی جے پی لیڈروں کے گھروں تک کانگریس کا ہاتھ پہنچ چکا ہے اور بی جے پی خیمے کے اندر ہی اٹھنے والی مخالف ہوا سے پورا فائدہ اٹھانے کی اسکیم بنائی گئی ہے ۔
خیال رہے کہ گزشتہ اسمبلی الیکشن کے موقع پر بی جے پی کے جگدیش شٹر اور لکشمن ساودی کو اپنے ساتھ ملانے میں کانگریس کو کامیابی ملی تھی جس سے لنگایت طبقہ کو یہ سگنل دیا گیا تھا کہ بی جے پی لنگایت مخالف ہے ۔ اس مرتبہ پارلیمانی الیکشن کے لئے بی جے پی نے بعض سینئر لیڈروں کو درکنار کرتے ہوئے نئے اور نوجوان چہروں کو اکھاڑے میں اتارنے کا فیصلہ کیا ہے جس سے کچھ سینئر لیڈر بغاوت کا بگل بجانے پر آمادہ ہوگئے ہیں اور کانگریس پارٹی اس موقع کو اپنے ہاتھ سےجانے دینے کے موڈ میں نہیں ہے ۔