کرتارپور کوریڈور:31 اکتوبرتک منصوبہ پورا کرلے گاہندوستان
نئی دہلی،12/جولائی (ایس او نیوز/ آئی این ایس انڈیا) کرتارپور کوریڈور کے جلد سے جلد تعمیر کے لئے حکومت ہند مسلسل کوشش کر رہی ہے۔مرکزی حکومت چاہتی ہے کہ گرو نانک دیو کی 550 ویں سالگرہ سے پہلے ہی کرتارپور کوریڈور کی تعمیر ہو جائے اور عقیدت مندوں کی نقل و حرکت شروع ہو جائے۔ذرائع کے مطابق دونوں طرف سے تعمیر کا کام تیزی سے کیا جا رہا ہے۔اس کوریڈور کے ذریعے تقریبا 10000 زائرین باقاعدہ سفر کریں گے۔اس صورت میں ہندوستانی حکومت نے اپنی طرف سے 31 اکتوبر کو حتمی تاریخ رکھی ہے۔اس سے پہلے وزارت خارجہ نے جمعرات کو کہا تھا کہ ہندوستان کرتارپور صاحب کوریڈور منصوبے کے لئے مکمل طور پر مصروف عمل ہے اور تیزی سے اس کا کام مکمل کرنا چاہتا ہے۔کرتارپور کوریڈور کی تعمیر کے لئے ہندوستان 500 کروڑ خرچ کرے گا۔اس کے ساتھ ہندوستان ہائی ٹیک نگرانی کے نظام کا استعمال کرے گا اور ایک مضبوط سیکورٹی نظام استعمال کیا جائے گا۔شری گرو نانک دیو جی کی 550 ویں سالگرہ کے موقع سے پہلے جیسے جیسے کرتارپور کوریڈور کی تعمیر کا کام آگے بڑھ رہا ہے ویسے ویسے پنجاب میں اکالی دل-بھارتیہ جنتا پارٹی (بی جے پی) اور حکمراں کانگریس کے درمیان کریڈٹ لینے کے لئے مقابلہ شروع ہوگیا ہے۔اکالی دل چیف سکھبیر سنگھ بادل نے چنڈی گڑھ میں پریس کانفرنس کرتے ہوئے ایک ویڈیو دکھایا تھا جس میں انہوں نے بتایا تھا کہ کرتارپور کوریڈور کی شکل کس طرح کی ہوگی اور اب تک تعمیراتی کام کتنا آگے بڑھ چکا ہے۔سکھبیر بادل نے یہ بھی بتایا کہ حکومت ہند کی جانب سے پاکستان سے اس کوریڈور کو ویزا فری بنانے کی مانگ کی گئی تھی، لیکن پاکستان تعاون نہیں کر رہا ہے۔اس پریس کانفرنس میں سکھبیر بادل نے دعوی کیا کہ کرتارپور کوریڈور کو لے کر سارا خرچ حکومت ہند کی جانب سے اٹھایا جا رہا ہے۔