ہندوستان نے چین کو پھر دیا جھٹکا، 47 مزید چینی موبائل ایپ پر پابندی کا فیصلہ!
نئی دہلی،27؍جولائی(ایس او نیوز؍ایجنسی) حکومت ہند کے ذریعہ 59 چینی ایپس پر پابندی عائد کرنے کے تقریباً ایک مہینے بعد مزید 47 چینی ایپس پر پابندی عائد کی گئی ہے۔ جن تازہ ایپس پر پابندی حکومت ہند نے عائد کی ہے، اس کے بارے میں بتایا جاتا ہے کہ پہلے جن ایپس پر پابندی عائد کی گئی تھی اس کے کلون یعنی عکس ہیں۔ تازہ پابندی سے متعلق جانکاری میڈیا ذرائع سے موصول ہوئی ہے اور اس طرح دیکھا جائے تو چین کو ہندوستان نے ایک بار پھر زبردست جھٹکا دیا ہے۔ بتایا جا رہا ہے کہ تازہ پابندی سے متعلق فہرست جلد جاری کی جائے گی۔
ایک سرکاری ذرائع کے حوالےسے خبر رساں ادارہ آئی اے این ایس نے بتایا کہ پابندی عائد کیے جانے والے ایپس پہلے سے پابندی عائد کیے گئے ایپس کے کلون کی شکل میں پائے گئے ہیں۔ ان نئے ایپس پر پابندی کی بات الیکٹرانکس اور انفارمیشن ٹیکنالوجی وزارت کے ذریعہ 59 ممنوعہ ایپ کے احکامات پر سختی سے عمل کرنے یا خلاف ورزی کے معاملے میں سنگین کارروائی کرنے کے لیے سامنے آئی۔ وزارت نے متعلقہ سبھی کمپنیوں کو خط لکھا ہے اور کہا ہے کہ بالواسطہ یا بلاواسطہ طور سے ایپ دستیاب کرانا آئی ٹی ایکٹ اور دیگر قوانین کی خلاف ورزی ہے۔
ایک رپورٹ کے مطابق حکومت ہند نے 275 چینی موبائل ایپ کی بھی فہرست تیار کیا ہے اور ان کی جانچ کی جا رہی ہے۔ ان میں پب جی گیم، جلی، کیپ کٹ، فیس یو، می ٹو، ایل بی ای ٹیک، پرفیکٹ کارپ، سینا کارپ، نیٹیز گیمس، علی ایکسپریس، ریسو اور یولائک جیسے ایپ شامل ہیں۔