ہبلی 19 اپریل (ایس او نیوز) شہر کے ودیا نگر بی وی بی کیمپس میں ایک ناکام عاشق نے طالبہ کو چاقو کے بے شمار وار کرتے ہوئے قتل کر ڈالا۔

مقتول طالبہ کا نام نیہا ہیرے مٹھ بتایا جاتا ہے جو کہ ہبلی دھارواڑ میونسپل کارپویشن کے رکن نیرنجیا ہیرے مٹھ کی بیٹی تھی ۔ قتل کے الزام میں کالج کے سابق طالب علم فیاض کو گرفتار کر لیا گیا ہے۔

بتایا جاتا ہے کہ پچھلے کچھ عرصے سے ملزم فیاض نیہا سے عشق لڑانے کے لئے پیچھے پڑا ہوا تھا مگر نیہا نے اس کی پیش کش ٹھکرائی تھی ۔ آج جب امتحان دینے کے لئے نیہا کالج میں آئی تو فیاض نے بدلہ لینے کے مقصد سے کالج احاطے میں ہی اس پر چاقو سے 9 سے زائد مرتبہ حملہ کر دیا جس کی وجہ سے خون میں لت پت نیہا زمین پر ڈھیر ہوگئی۔

کالج کے اساتذہ نے فوری طور پر زخمی نیہا کو کیمس اسپتال میں منتقل کروایا مگر زخموں کی تاب نہ لاتے ہوئے اس نے اسپتال میں دم توڑ دیا ۔