غزہ یکم نومبر (ایس او نیوز/ایجنسی)  فلسطین کی مزاحمتی تنظیم حماس نے  اسرائیل کو متنبہ کرتے ہوئے کہا ہے کہ ہمارا دفاعی آپریشن جاری ہے اور ابھی تو ہم نے  صرف شروعات  کی ہے،   انہوں نے کہا کہ ہمیں اب   بہت کچھ کرنا ہے اور ہم  غزہ کو دشمن کا قبرستان بنا دیں گے۔

غیرملکی میڈیا  رپورٹ کے مطابق  منگل کو ایک ویڈیو پیغام میں فلسطین کی مزاحمتی تنظیم حماس کے مسلح ونگ عزالدین القسام بریگیڈز کے ترجمان ابو عبیدہ نے مسجد اقصٰی کے دفاع کا اعادہ کرتے ہوئے مسلمانوں کو مخاطب کرتے ہوئے  کہا کہ  وہ موقع سے فائدہ اٹھائیں اور اس جنگ میں شامل ہوجائیں۔انہوں نے کہا کہ ان کے جنگجو اب تک کم از کم 22 اسرائیلی فوجی گاڑیوں کو تباہ کرچکے ہیں۔ ہمارے جنگجوؤں نے دشمن کے ٹینکوں اور گاڑیوں کو مختلف اینٹی آرمڈ ہتھیاروں سے نشانہ بنایا ہے۔ جھڑپوں کے دوران بڑی تعداد میں دشمن کے فوجیوں کو ہلاک اور زخمی کرنے میں کامیاب ہوگئے ہیں۔

ابوعبیدہ نے کہا کہ دشمن کے اہداف پر حملہ کرنے کے لیے ہم  نے  کم فاصلے تک مار کرنے والے میزائل  استعمال کیے ہیں۔ ابوعبیدہ نے دعویٰ کیا کہ اس جنگ میں اسرائیل گھٹنے ٹیکے گا اور یہ نیتن یاہو کے خاتمے کا باعث بنے گی۔ انہوں نے اسرائیل کی جانب سے اپنی ایک خاتون فوجی کو حماس کی قید سے چھڑانے کے دعوے کو مسترد کرتے ہوئے کہا تم جنگ کے ایک ماہ بعد ایک قیدی کو رہا کروانے کا جھوٹا دعویٰ کرکے جشن منا رہے ہو، اس طرح تو تمہیں اپنے تمام قیدیوں کو چھڑوانے کے لیے 20 سال درکار ہوں گے۔ انہوں نے ثالثی کرنے والے ممالک کو آگاہ کرتے ہوئے کہا  کہ ہم آنے والے دنوں میں مزید غیر ملکی قیدیوں کو رہا کردینگے۔

حماس ترجمان نے اسرائیلی بمباری کا نشانہ بننے والے جبالیہ پناہ گزین کیمپ میں اپنے کمانڈر کی موجودگی کی بھی تردید کرتے ہوئے اسے بے بنیاد اور جھوٹ قرار دیا۔ واضح رہے کہ منگل کو جبالیہ پناہ گزین کیمپ پر اسرائیلی فضائی حملے میں سینکڑوں افرادجاں بحق ہوئے تھے اور سینکڑوں زخمی بھی  ہوئے تھے۔