غزہ 10/نومبر (ایس او نیوز/ایجنسی) غزہ میں اسرائیل کی طرف سے جاری وحشیانہ بمباری کے درمیان حماس اور اسرائیل کے درمیان قیدیوں کے تبادلے کے معاملے پر معاہدہ ہونے کی اطلاع موصول ہوئی ہے۔
العربیہ چینل کے حوالے سے میڈیا میں آئی خبروں کے مطابق دونوں فریقین کے درمیان کئی دن کے مذاکرات کے بعد قیدیوں کے تبادلے کا معاہدہ ہوا ہے اور دونوں نے اس بات پر اتفاق کیا ہے کہ اسرائیلی جیلوں میں قید فلسطینی خواتین اوربچوں کی رہائی کے بدلے میں حماس کی جانب سے 100 یرغمالی خواتین اوربچوں کورہا کیا جائے گا۔
رپورٹ میں ذرائع کے حوالے سے بتایا گیا ہے کہ انسانی بنیادوں پر طے پانے والے اس معاہدے کے لئے کئی ہفتوں سے بات چیت جاری تھی۔
رپورٹوں کے مطابق قطر کی جانب سے کئی ہفتوں سے دونوں فریقین کے درمیان قیدیوں کے تبادلے کے معاہدے کے لیے کوششیں کی جا رہی تھیں، جو جمعہ کو بالآخر کامیاب ہوئی۔
خیال رہے کہ حماس کی قید میں 241 سے زائد اسرائیلی موجود ہیں جن میں سے اب تک 4 یرغمالیوں کو رہا کیا گیا ہے۔
7 اکتوبر سے اسرائیلی جارحیت کے نتیجے میں اب تک 11 ہزار سے زائد فلسطینی شہید ہو چکے ہیں جن میں 4506 بچے بھی شامل ہیں۔