راجیہ سبھا کی 18نشستوں کیلئے انتخابات 19 جون کو
نئی دہلی،2؍ جون(ایس او نیوز؍آئی این ایس انڈیا) راجیہ سبھا کی18نشستوں کے لئے رواں ماہ کی19تاریخ کو انتخابات ہوں گے- الیکشن کمیشن نے یہ معلومات دی ہیں -ان میں مدھیہ پردیش اورگجرات بھی شامل ہیں جہاں توڑجوڑکاکھیل چلاہے -مارچ میں ہونے والے انتخابات کورونا وائرس کی وبا اور اس کے نتیجے میں ملک بھر میں لاک ڈاؤن کے پیش نظر ملتوی کردیئے گئے تھے- اب لاک ڈاؤن میں نرمی کی جارہی ہے، لہٰذاکمیشن نے انتخاب کی تاریخ کا اعلان کردیا-الیکشن کمیشن نے کہاہے کہ چیف سکریٹریوں سے کہا گیا ہے کہ وہ ایک سینئرافسر کی تعیناتی کریں تاکہ انتخابات کے انعقادکے نظام کو یقینی بنایا جائے- کووڈ-19کی روک تھام کے تمام طریقوں پر عمل کرنا چاہئے-گذشتہ فروری میں، کمیشن نے17 ریاستوں میں 55نشستیں بھرنے کیلئے انتخابات کا اعلان کیا تھا- انتخابی اہلکاروں نے مارچ میں کہا تھا کہ10ریاستوں میں 37 نشستیں بلامقابلہ پرکی گئیں - الیکشن کمیشن نے پیرکوکہاہے کہ تمام عوامل کو مدنظر رکھتے ہوئے18 نشستوں پر انتخابات کرانے کا فیصلہ کیا ہے-اس فہرست میں آندھرا پردیش اور گجرات کی4نشستیں، مدھیہ پردیش اور راجستھان میں تین، جھارکھنڈ میں دو اور شمال مشرقی ریاستوں میگھالیہ اور منی پور میں ایک ایک نشست شامل ہے-ووٹنگ19جون کو صبح9بجے شروع ہوگی-