نئی دہلی،15/جنوری (آئی این ایس انڈیا) امبالا کی سنٹرل جیل ایک بار پھر سرخیوں میں ہے۔ یہاں جیل میں قیدی کی خودکشی کا معاملہ طول پکڑ چکا ہے،جہاں ایک قیدی نے اپنی ہاتھ پر لکھے ایک خود کش نوٹ میں ڈپٹی جیلر راکیش لوچر کا نام لکھا ہے۔

قیدی نے لکھا ہے کہ میری موت کا ذمہ دار ڈپٹی جیلر راکیش لوچر ہیں۔ ڈپٹی جیلرکے خلاف لگے سنگین الزامات کے درمیان ان کا تبادلہ دو دن قبل پنچکولہ جیل کردیا گیا۔ واضح رہے کہ امبالا سنٹرل جیل سوالوں کے گھیرے میں ہے کیوں کہ یہاں پہلی بار خودکشی کا معاملہ نہیں ہو رہا ہے۔ اس سے قبل جون 2020 میں 2 قیدی خودکشی کرچکے ہیں۔گزشتہ ایک ہفتے سے جیل انتظامیہ پر پابندیوں کے ساتھ مار پیٹ کے الزامات لگ رہے ہیں۔ اور اب ایک قیدی نے اپنی زندگی ختم کرکے ڈپٹی جیلر کو مورد کا الزام ٹھہرایا۔

متوفی قیدی کے بیٹے اجے نے بتایا کہ اس کے والد کو 20 سال کی سزا سنائی گئی تھی، لیکن بدھ کے روز ایک فون آیا کہ اس کے والد کی موت ہوگئی ہے۔ ان کے ہاتھ پر ’راکیش لوچر موت کا ذمہ دار ہے‘ لکھا ہوا تھا، اس معاملے میں ڈی ایس پی سلطان سنگھ نے کہا کہ ایک قیدی کی خودکشی کا معاملہ آیا، جس کا نام وجے اور اس کو دفعہ 302 کے تحت  عمر قید کی سزا سنائی گئی ہے۔ پولیس اس معاملے کی تحقیقات کر رہی ہے۔ جو بھی سچ سامنے آئے گا، اس کے تحت کارروائی کی جائے گی۔