شمالی ہندوستان میں کڑاکے کی سردی، دھند کا زور بھی جاری
نئی دہلی،5/جنوری (ایس او نیوز/ایجنسی) ان دنوں شمالی ہندوستان میں شدید سردی کا اثر دیکھا جا رہا ہے۔ کئی ریاستوں میں حالات سرد دن اور شدید سردی کے دن کی صورت حال پیدا ہو گئی ہے۔ لوگ سردی سے بچاؤ کے لیے الاؤ کا سہارا لینے پر مجبور ہیں۔ محکمہ موسمیات کے مطابق شمالی ہندوستان کی ریاستوں میں شدید سردی برقرار رہے گی۔ اس کے علاوہ شمالی ہندوستان کی کئی ریاستوں میں شدید دھند بھی لوگوں کو پریشان کر سکتی ہے۔
محکمہ موسمیات کے مطابق پنجاب، ہریانہ، چنڈی گڑھ، دہلی، اتر پردیش اور راجستھان میں اگلے دو دنوں تک سرد دن سے شدید سرد کی صورتحال نظر آئے گی۔ دھند کی بات کریں تو شمال مغربی ہندوستان اور مشرقی ہندوستان کی ریاستوں میں اگلے تین دن تک شدید دھند چھائی رہے گی۔
محکمہ موسمیات کے مطابق ملک کی راجدھانی نئی دہلی میں آج یعنی 5 جنوری کو کم سے کم درجہ حرارت 7 ڈگری اور زیادہ سے زیادہ درجہ حرارت 14 ڈگری رہے گا۔ اس کے ساتھ ہی نئی دہلی میں آج سرد دن کی صورتحال رہے گی۔ دہلی میں 6 جنوری کو بھی سرد دن رہے گا۔
اتر پردیش کی راجدھانی لکھنؤ میں آج کم سے کم درجہ حرارت 10 ڈگری اور زیادہ سے زیادہ درجہ حرارت 17 ڈگری رہے گا۔ اس کے ساتھ ہی لکھنؤ میں آج شدید دھند چھائی رہے گی۔ غازی آباد کی بات کریں تو آج یہاں کم سے کم درجہ حرارت 10 ڈگری اور زیادہ سے زیادہ درجہ حرارت 16 ڈگری ریکارڈ کیا جا سکتا ہے۔ وہیں آج غازی آباد میں بھی شدید دھند چھائی رہے گی۔
موسم کی پیشین گوئی کرنے والی ایجنسی اسکائی میٹ کے مطابق آج لکشدیپ، کیرالہ اور ساحلی کرناٹک میں ہلکی سے درمیانی بارش کے ساتھ کچھ مقامات پر موسلادھار بارش ہو سکتی ہے۔ تمل ناڈو، اندرونی کرناٹک، رائلسیما، انڈمان اور نکوبار جزائر کے جنوبی حصوں، آندھرا پردیش کے جنوبی ساحل، مدھیہ پردیش کے کچھ حصوں، شمالی چھتیس گڑھ، مشرقی اتر پردیش، جھارکھنڈ اور بہار کے کچھ حصوں میں ہلکی سے درمیانی بارش کا امکان ہے۔
