کولار: رحمت نگر میں ہائی اسکول قائم کرنے کے لئے رحمت نگر کے ذمہ داران پر مشتمل وفد کی ڈپٹی کمشنر سے ملاقات
کولار 29 جنوری (ایس او نیوز/شبیر احمد) کے یم ایف ڈائریکٹر (KMF Director) یونس شریف عرف شنشیر کی قیادت میں آئیٹا اور کراٹا کے مشترکہ وفد نے کولار ڈپٹی کمشنر اکرم پاشاہ صاحب سے ملاقات کی اور رحمت نگر میں ہائی اسکول قائم کرنے کی درخواست کی۔
یونس شمشیر صاحب نے ڈپٹی کمشنر سے ہائی اسکول کے سلسلے میں وزیر اعلی کے سیاسی سکریٹری نصیر احمد صاحب اور ضلع نگراں کار وزیر بائرتی سریش کے تیقن کا حوالہ دیتے ہوئے گزارش کی کہ رحمت نگر ، کولار سٹی کا کثیر آباد ی والا علاقہ ہے جہاں ہائی اسکول نہ ہونے کی وجہ سے کئی طلبہ خصوصاً لڑکیاں اعلی تعلیم سے محروم ہورہی ہیں جس کے نتیجے میں اسکول سے ڈراپ آوٹ کی شرح میں ہر سال اضافہ ہورہا ہے. وفد نے ڈپٹی کمشنر پر زور دیا کہ علاقے میں ہائی اسکول کی اشد ضرورت کو دیکھتے ہوئے ہائی اسکول کے قیام کو یقینی بنائیں۔اس موقع پر ڈپٹی کمشنر اکرم پاشاہ نے بذریعہ فون ڈی ڈی پی آئی سے اس معاملہ پر گفتگو کی اور وفد کو یقین دلایا کہ بہت جلد اس تعلق سے مناسب کاروائی کی جائے گی۔ اس وفد میں آئیٹا کے ضلعی صدر اصغر جاوید، سکریٹری ایاز احمد، محمد سہیل پاشاہ، یونس خان، سی آر پی ذبیح اللہ اور علیم پاشاہ موجود تھے۔