کرناٹکا میں موٹر گاڑیوں کے ہائی سیکیوریٹی نمبر پلیٹس کی تاریخ میں توسیع
بینگلورو،14 / فروری (ایس او نیوز) ریاست کرناٹکا میں موٹر گاڑیوں کے پرانے نمبر پلیٹس کو نئے ہائی سیکیوریٹی رجسٹریشن پلیٹس (ایچ ایس آر پی) سے بدلنے کی آخری تاریخ میں توسیع کی گئی ہے ۔
وزیر برائے نقل و حمل رام لنگا ریڈی نے بتایا کہ نمبر پلیٹس بدلنے کے لئے مزید تین مہینے کی مہلت دی جا رہی ہے ۔ معلوم ہوا ہے کہ ملک کی دوسری ریاستوں کے مقابلے میں کرناٹکا کے اندر نئے نمبر پلیٹس لگوانے کا سلسلہ بہت ہی سست رفتاری سے چل رہا ہے اور یہاں اب تک 18,32,787 موٹر گاڑیوں کے نمبر پلیٹس بدلے گئے ہیں اور موٹر گاڑیوں کی تعداد کو دیکھتے ہوئے صرف 9.16 % بنتا ہے ۔
وزیررام لنگا ریڈی نے اسمبلی میں ایک سوال کا جواب دیتے ہوئے بتایا کہ " دوسری ریاستوں میں یہ کام تیزی سے ہو رہا ہے، جبکہ ہماری ریاست میں تاخیر ہو رہی ہے ۔ اور اسے مکمل کرنے کے لئے مزید تین مہینے کی مہلت دی جا رہی ہے ۔ اس کارروائی میں تیزی لانے کے لئے اقدامات کیے جا رہے ہیں ۔"