پتور میں سی پی آئی ایم نے کیا "بی جے پی کو ہراو - بھارت کو بچاو" مہم کا آغاز
پتور، 8 / اپریل (ایس او نیوز) کمیونسٹ پارٹی آف انڈیا (مارکس وادی) نے پارلیمانی الیکشن میں انڈیا بلاک سے وابستہ امیدواروں کو جیت دلانے کے لئے پتور میں "بی جے پی کو ہراو- بھارت کو بچاو" مہم کا آغاز کیا ۔
اس موقع پر بولتے ہوئے سی پی آئی ایم کے لیڈر ایڈوکیٹ بی ایم بھٹ نے کہا کہ عام لوگوں کے حقوق اور سہولتیں چھین کر کارپوریٹس کا تحفظ اور تعاون کرنے والی بی جے پی کو اس الیکشن میں شکست دینا بہت ہی ضروری ہوگیا ہے اس وجہ سے یہ مہم شروع کی گئی ہے ۔ کیونکہ اگر پھر ایک بار بی جے پی اقتدار پر آتی ہے تو عوام کی زندگی کے لئے انتہائی نقصان دہ بات ہوگی ۔
بھٹ نے کہا کہ سیکیوریٹی بانڈس کا گھوٹالہ ملک کا سب سے بڑا اسکینڈل ہے ۔ 'نہ کھاوں گا نہ کھانے دوں گا' کی بات کرنے والے وزیر اعظم نریندرا مودی اب 'میں اکیلا کھاوں گا ، کسی دوسرے کو کھانے نہیں دوں گا' جیسے کام کر رہے ہیں ۔ کرپشن کا موقع نہ دینے کی بات کہنے والے مودی اب کرپٹ لوگوں کو اپنی پارٹی میں شامل کر رہے ہیں ۔ اور اس پارٹی میں شامل ہوتے ہی ان کا کرپشن پوری طرح صاف ہو جاتا ہے ۔ بدعنوان لیڈروں کو اپنے ساتھ ملاتے ہوئے مودی خود کو دیش بھکت اور رام بھکت کہلاتے ہوئے عوام کو گمراہ کر رہے ہیں ۔
بی ایم بھٹ نے کہا کہ بی جے پی کے گزشتہ 35 سالہ دور میں ضلع میں کوئی ترقیاتی کام نہیں ہوا ہے ۔ اس لئے عوام چاہتے ہیں کہ ضلع میں انڈیا بلاک کے امیدوار کی جیت ہو ۔ دیش میں انڈیا بلاک کی حکومت بنے ۔