نئی دہلی،9؍اپریل (ایس او نیوز؍یواین آئی) سپریم کورٹ نے بدھ کے روز ایک اہم حکم جاری کرتے ہوئے کہا کہ تسلیم شدہ پرائیویٹ لیباریٹریوں میں بھی کورونا وائرس‘کووڈ -19 کی جانچ مفت کی جائے گی - کورٹ نے دن میں سماعت کرتے ہوئے کہا تھا کہ پرائیوٹ لیباریٹریوں میں کورونا وائرس انفیکشن کی جانچ کے لئے زیادہ فیس نہیں وصول کی جا سکتی اور وہ اس معاملے میں اپنا حکم سنائے گا -

اس کے بعد عدالت نے شام کو عبوری حکم جاری کیا، جس میں اس نے واضح کیا ہے کہ جس طرح سرکاری اسپتالوں میں کورونا وائرس انفیکشن کی جانچ مفت ہو رہی ہے، ویسے ہی حکومت کی طرف سے تسلیم شدہ لیباریٹریوں میں بھی یہ جانچ مفت کی جائے گی -

جسٹس اشوک بھوشن اور جسٹس ایس رویندر بھٹ کی بینچ نے اپنے عبوری حکم میں کہا ہے کہ مرکزی حکومت اس معاملے میں فوری طور پر ضروری ہدایات جاری کرے گی - عدالت نے عرضی گزار ششانک دیو سدھی کے دلائل کوبادی النظر میں صحیح مانتے ہوئے کہا ہے کہ اس وقت پرائیویٹ لیباریٹریوں کو بھی آگے بڑھ کر ملک کی خدمت کرنی چاہئے - مفت جانچ کیلئے ان لیباریٹریوں کو حکومت کی جانب سے کچھ رقومات فراہم کی جانی چاہئیں یا نہیں، اس تعلق سے بعد میں فیصلہ کیا جائے گا -

درخواست میں کہا گیا ہے کہ کورونا وائرس سے متعلق تمام ٹسٹ نیشنل ایکڈرڈیشن بورڈ فور ٹسٹنگ اینڈ کولبریشن لیباریٹریز (این اے بی ایل) سے تسلیم شدہ لیباریٹریزکے تحت ہی کئے جانے چاہئیں، کیونکہ غیر تسلیم شدہ لیباریٹریاں عالمی معیار کے مطابق نہیں ہیں -عرضی میں حکومت کو یہ بھی ہدایات دینے کی مانگ کی گئی ہے کہ وہ سرکاری ڈاکٹروں اور پیرامیڈیکل اسٹاف سمیت تمام نجی اسپتالوں کے ڈاکٹروں کو ایڈجسٹ کرنے کے لئے کہے تاکہ وہ مؤثر طریقے سے اس وبا کے خلاف جنگ میں شامل ہو سکیں -

درخواست گزار نے ہندوستانی طبی تحقیق کونسل (آئی سی ایم آر) کی طرف سے17مارچ کو جاری مشاورت کو آئین کے آرٹیکل14اور21کی دفعات کے خلاف بتایا ہے اور کہا ہے کہ اس مشاورت میں کورونا وائرس کے پیش نظر غیر معمولی صحت کے بحران میں ٹسٹ جانچ کی سہولت کی پہنچ میں امتیازی سلوک کیا گیا ہے -