ریاستی بی جے پی میں پڑگئی پھوٹ؛ ایشورپا کے بعد سدانندا گوڈا بھی پارٹی قیادت سے ناراض
بنگلورو، 19/ مارچ (ایس او نیوز /ایجنسی) موجودہ رکن پارلیمان بنگلورو نارتھ لوک سبھا حلقہ کے لئے بی جے پی ٹکٹ سے محروم ہونے کے بعد پارٹی کی ریاستی قیادت سے ناراض سدانند گوڑا نے کہا کہ وہ اپنے اگلے سیاسی اقدام کا اعلان کریں گے۔
سدانند گوڑا نے کہا کہ یہ سچ ہے کہ کچھ لیڈروں نے کانگریس پارٹی میں شامل ہونے کے لیے اُن سے رابطہ کیا ہے۔ لیکن میں ذاتی طور پر کوئی فیصلہ نہیں کروں گا۔ کنبہ کے افراد کے ساتھ تبادلہ خیال کے بعد میں آئندہ فیصلہ کروں گا۔
بی جے پی کے ایک بڑے لیڈر کل ہمارے گھر آئے تھے اور بات چیت کی تھی لیکن میں ان کے ساتھ ہونے والی گفتگو کی تفصیلات نہیں بتاؤں گا۔ اگر آج سب کچھ کہا جائے تو کل کے لیے کچھ نہیں بچے گا۔ میں کل آپ کے ساتھ تمام خیالات کا اشتراک کروں گا۔ وزیر اعظم نریندر مودی ریاست کے دورہ پر ہیں۔
انہوں نے سابق نائب وزیر اعلیٰ کے ایس ایشور پا کی بغاوت کے بارے میں پوچھے گئے سوال کا جواب دیتے ہوئے کہا کہ پارٹی میں جس کے ساتھ بھی ظلم ہوا ہے، سب مل کر ہائی کمان کے پاس جانے کی تجویز میں نے دی تھی ۔ لیکن ایشورپا نے پہلے ہی اپنے اقدام سے پیغام دے دیا ہے۔ اس بارے میں کچھ نہیں کہوں گا۔
بنگلورو نارتھ لوک سبھا حلقہ کے امیدوار کو منتخب کرنے کے لیے کیے گئے سروے میں رپورٹ میں صرف میرا نام ہی آیا ہے۔ مجھے ٹکٹ دینے کا وعدہ کیا گیا تھا، آخری وقت میں میرے ساتھ دغا کیا گیا۔
سدانند گوڑا نے کہا کہ میں نے دہلی اور ہماری ریاست میں ہونے والی کچھ تبدیلیوں کو قریب سے دیکھا ہے۔ میں کل ایک پریس کا نفرنس بلاؤں گا، تا کہ ریاست میں میرے ساتھ ہونے والی نا انصافی کے بارے میں کچھ دلی خیالات کا اظہار کروں۔ سیاست میں ہلچل اور شرمندگی فطری ہے۔ لیکن جان بوجھ کر کیا جانے والا کام انتہائی تشویشناک ہے۔
