وزیراعلیٰ سدارامیا نے کرناٹک میں بیس سیٹوں پرجیت درج کرنے کا ظاہر کیا عزم
بنگلورو، 20/اپریل (ایس او نیوز/ایجنسی) کرناٹک دو مرحلوں یعنی 26/اپریل اور 7/مئی کو ہونے والے لوک سبھا انتخابات کو دیکھتے ہوئے ایک طرف بی جے پی لیڈران مودی کی گارنٹی کے نام پر عوام سے ووٹ دینے کی اپیلیں کرتے نظر آرہے ہیں تو وہیں کانگریس اور انڈیا الائنس کے لیڈران بی جے پی پر عوام کے ساتھ جھوت بولنے اوردھوکہ دینے کا الزام لگاتے ہوئے ملک میں بے روزگاری اور مہنگائی کو کم کرنے اور عوام کے مسائل کو حل کرنے کے نام پرووٹ مانگ رہے ہیں۔ ایسے میں ریاست کے وزیر اعلیٰ سدارامیا نے دعویٰ کیا ہے کہ آنے والے لوک سبھا انتخابات میں کانگریس کرناٹک کی 28 میں سے 20 سیٹوں پر کامیابی کا پرچم لہرائے گی۔
میڈیا نمائندوں سے بات چیت کرتے ہوئے سدرامیا نے کہا کہ کانگریس کے تئیں رائے دہندگان کا ردعمل اب تک بہت مثبت رہا ہے۔
بی جے پی کے ریاستی صدر بی وائی وجیندر کے اس تبصرہ پر کہ لوک سبھا انتخابات کے بعد کانگریس کی گارنٹی بند ہو جائے گی، وزیر اعلیٰ نے پوچھا کہ کیا لیڈر اب غیب کی باتیں بھی جاننے لگے ہیں؟ وزیر اعلیٰ سدارامیا نے یقین دلایا کہ ہم اپنی میعاد پوری کرنے کے بعد کرناٹک میں ہی رہیں گے۔ اگلی بار بھی ہم ہی اقتدار میں آئیں گے۔ انہوں نے کہا کہ ریاست میں کانگریس سرکاری نے جو گارنٹیاں متعارف کرائی ہیں اںہیں بغیر کسی وجہ کے بند نہیں کیا جائے گا۔
وزیر اعلیٰ سدارامیا نے کہا کہ اگلے مالی سال میں گارنٹی اسکیموں کو لاگو کرنے کے لیے 52,000 کروڑ روپے کی رقم مختص کی جائے گی۔ چکبلا پور شہر میں ایک میگا روڈ شو میں حصہ لیتے اور کانگریس کی امیدوار رکشا رمیّا کی انتخابی مہم چلاتے ہوئے وزیر اعلیٰ سدارمیّا نے دعویٰ کیا کہ کرناٹک میں کانگریس بھاری اکثریت سے جیت درج کرنے جا رہی ہے۔ کانگریس یہاں کی 28 سیٹوں میں سے 20 پر کامیابی کا پرچم لہرائے گی۔ واضح رہے کہ کرناٹک میں لوک سبھا کی 28 سیٹوں پر دو مرحلوں 26 اپریل اور 7 مئی کو انتخابات ہوں گے۔