کولکاتا،6/مارچ (ایس او نیوز/ایجنسی)  چیف الیکشن کمشنر راجیو کمار نےاعلا ن کیا ہے کہ  انتخابات کے دوران طاقت اور دولت کے ناجائز استعمال کو روکنے کے لیے مرکزی ایجنسیوں کی مدد لی جائے گی انہوں نے  اس کے لئے   متعدد مرکزی ایجنسیوں پر مشتمل ایک پورٹل بنانے کا بھی اعلان کیااور کہا کہ تمام مرکزی ایجنسیوں کے ساتھ ایک پورٹل بنایا گیا ہے، جس کا مقصد انتخابات میں مالی بدعنوانی کو روکنا ہے۔

میڈیا رپورٹوں کے مطابق چیف الیکشن کمشنر کی قیادت میں ایک فل بنچ لوک سبھا انتخابات کی تیاریوں کا جائزہ لینے کے لیے ریاست بنگال  کے دورے پر تھا ۔ کمیشن نے منگل کو پریس کانفرنس سے پہلے 22 مرکزی ایجنسیوں کے ساتھ میٹنگ کی۔ کمیشن کے ذرائع کے مطابق ای ڈی یا محکمہ انکم ٹیکس جیسی مرکزی تفتیشی ایجنسیاں بھی انتخابات میں کالے دھن اور غیر قانونی لین دین کی نگرانی کریں گی۔

 کُل جماعتی میٹنگ میں کمیشن نےسیاسی جماعتوں کے بیانات اور شکایات کی سماعت کی جس میں  ترنمول کانگریس سمیت کل آٹھ پارٹیوں نے شرکت کی۔ پریس کانفرنس میں راجیو نے ان تمام شکایات کا تذکرہ کیا جو سیاسی جماعتوں نے کی ہے۔انہوں نے کہا کہ پیسے کے ساتھ ساتھ غنڈوں کی طاقت کے استعمال کی بھی شکایات درج کرائی گئی ہیں۔ انہوں نے کہا کہ بیوروکریسی کی جانبداری برتنے سے متعلق بھی شکایت کی گئی ہے ۔کمیشن نے کہا کہ وہ ووٹنگ سے پہلے اور ووٹنگ کے بعد تشدد کو روکنے کی کوشش کریں گے۔ راجیو نے کہا کہ ایک سیاسی جماعت کو چھوڑ کر تمام جماعتوں نے اضافی مرکزی فورسز کا مطالبہ کیا ہے۔ انسپکٹرز سے بھی درخواست کی جاتی ہے کہ وہ متحرک رہیں۔

کمیشن نے کہا کہ اس بار ریاست میں 80,000سے زیادہ بوتھوں پر ووٹنگ ہوگی۔ اس بار نئے ووٹرز کی تعداد 15 لاکھ 25 ہزار ہے۔ریاست کے کم از کم 50 فیصد بوتھوں کی نگرانی کے لیے براہ راست ویب کاسٹنگ کی جائے گی۔ کمیشن کے مطابق عام شہری بھی الیکشن سے متعلق کوئی شکایت ایپ کے ذریعے درج کرا سکتے ہیں۔ الیکشن کمیشن آزادانہ اور پرامن انتخابات کرانے کے لیے پرعزم ہے۔