نئی دہلی،23؍اکتوبر (ایس او نیوز؍ایجنسی)  ملک میں 100؍ کروڑ ٹیکے لگائے جانے پر جشن کا ماحول ہونے کا دعویٰ حکومت کررہی ہے۔ اسی لئے وزیر اعظم مودی نے جمعہ کو صبح 10؍ بجے قوم سے خطاب کرتے  100؍ کروڑ ٹیکوں کو غیر معمولی کارنامہ قرار دیا۔ وزیر اعظم  مودی نےکہا کہ اگرچہ ملک میں ایک ارب ٹیکے لگائے گئے ہوں لیکن کورونا کے خلاف جنگ ابھی ختم نہیں ہوئی ہے ، اس لئے سبھی کو بہت محتاط رہنا ہوگا اور ہتھیار نہیں ڈالنے ہیں۔ مودی نے کہا کہ تہواروں کا موسم قریب آرہا ہے اور اس دوران ہم سب کو بہت محتاط رہنا ہوگا کیونکہ ابھی تک کورونا وباسے ہمیںمکمل طور پر نجات نہیں ملی ہے۔ انہوں نے کہا کہ کورونا کے خلاف جنگ ابھی ختم نہیں ہوئی ہے ، اس  لئے کسی کو بھی ہتھیار نہیں ڈالنا ہے اور اپنے  آلات تحفظ بھی پہنے رکھنے ہیں۔ انہوں نے کہا کہ جس طرح ہم گھر سے باہر جاتے ہوئے جوتے پہننا نہیں بھولتے ، اسی طرح ہمیں ماسک کو نہیں بھولنا چا ہئے۔ ہم اسےاپنی زندگی کی اہم عادت بنالیں۔وزیر اعظم نے کہا کہ جنھیں ابھی تک ویکسین نہیں دی گئی ہے ، انھیں ویکسین  ترجیحی بنیاد پر لینی ہے اس معاملے میں کوئی کوتاہی نہ ہو کیوں کہ یہ ملک کے مستقبل کا سوال ہے۔  انہوں نے کہا کہ اگر ہم کورونا کے خلاف اپنے آلات تحفظ   پہنتے رہیں گے تو ہم ضرور جیتیں گے۔

 قابل ذکر ہے کہ جمعرات کو ملک نے کووڈ وبا کے خلاف مہم میں ایک ارب ویکسی نیشن کا غیر معمولی سنگ میل عبور کرتے ہوئے تاریخی کامیابی حاصل کی ہے۔ اس موقع پر وزیراعظم مودی نے زرعی شعبے میں ہونے والی ترقی کا بھی ذکر کیا اور کہا کہ کورونا کے دوران زرعی شعبے نے معیشت کو بہتر  بنایا ہے۔اس دوران ریکارڈ مقدار میں فصلوں کی خرید ہوئی  ہے اورکسانوں کے بینک کھاتے میں براہ راست پیسے بھیجے جا رہے ہیں۔ انہوں نے اس دوران کورونا وبا کی بابت عوام سے احتیاط برتنے کی اپیل کی اور کہا کہ تیوہاروں کے موقع پر انہیں مزید محتاط رہنا چا ہئے۔ 

  وزیر اعظم 100؍ کروڑ کووڈ ویکسین کے حوالے سے ہندوستانی دیسی ویکسین پروگرام کی کامیابی کے ساتھ معاشی ترقی کا ذکر کرتے ہوئے  ملک کے باشندوں سے میڈ ان انڈیا کو عوامی تحریک بنانے کی اپیل کی۔ انہوں نے کہا کہ  میڈ ان انڈیا کو عوامی تحریک بنائیں اور ملک میں تیار اشیاء خریدنے کو اپنےمعمول میں لائیں۔   انہوں نے کہا کہ ویکسین کی بڑھتی ہوئی کوریج کے ساتھ ، ہر شعبے میں مثبت سرگرمیاں تیز ہو رہی ہیں۔ آج چاروں طرف اعتماد ، جوش اور امنگ کی فضا ہے۔ سو کروڑ ویکسین کے ساتھ ، ہندوستان کو آج ایک زیادہ محفوظ ملک کے طور پر دیکھا جا رہا ہے۔ انہوں نے کہا کہ ماہرین اور اندرون اور بیرون ملک سے کئی ایجنسیاں ہندوستان کی معیشت کے بارے میں بہت مثبت ہیں۔ آج ہندوستانی کمپنیوں میں نہ صرف ریکارڈ سرمایہ کاری ہو رہی ہے بلکہ نوجوانوں کیلئے روزگار کے نئے نئے مواقع بھی پیدا ہو رہے ہیں۔