کنداپور سڑک حادثہ؛ عیدالفطر منانے کیرالہ جانے کے دوران ہوئے حادثے میں خاتون کے بعد شوہر بھی چل بسا ؛ بیٹے کا علاج جاری
کنداپور 11 اپریل (ایس او نیوز) ممبئی سے عیدالفطر کی خوشیاں منانے کیرالہ کے کنور جانے کے دوران منگل 29 ویں رمضان میں پیش آئے سڑک حادثہ میں ایک روزہ دار خاتون جاں بحق ہونے کی اطلاع حادثے کے فوری بعد ساحل آن لائن پر دی گئی تھی، حادثے میں خاتون کے شوہر اور اس کے بیٹے کو شدید زخمی حالت میں منی پال اسپتال لے جایا گیا تھا، پتہ چلا ہے کہ اسپتال میں شوہر بھی زخموں کی تاب نہ لاکر چل بسا ہے۔
یاد رہے کہ کنداپور بس ڈپو کے سامنے واقع فلائی اوور سے گزرنے والی ایک تیز رفتار کار بے قابو ہو کر پُل کے نیچے واقع سروس روڈ پر گر گئی تھی۔ جس میں ایک خاتون جاں بحق اور اس کا شوہر اور بیٹا شدید زخمی ہوئے تھے۔ شوہر کے انتقال کے ساتھ حادثے میں مرنے والوں کی تعداد بڑھ کر دو ہوگئی ہے۔
بتایا جاتا ہے کہ حادثے کا شکار ہوئی کار میں کیرالہ کے کنور سے تعلق رکھنے والے مسافر سوار تھے ۔ مہلوکین کے نام منور (49 سال) اور سمیرا (41 سال) ہیں ۔ ان دونوں کا بیٹا سہیل شدید زخمی ہوا تھا، پتہ چلا ہے کہ اس کی حالت اب خطرے سے باہر ہے۔
معلوم ہوا ہے کہ مُنّورکولہاپور مہاراشٹرا کا رہنے والا تھا جو اپنی بیوی سمیرا اور بیٹے کے ساتھ کنّور میں واقع اپنی بیوی کے مائیکے جا رہا تھا ۔ کار خود منور چلا رہا تھا ۔ عینی شاہدین کے مطابق فلائی اوور پر کار بے قابو ہوگئی اور فلائی اوور سے پھسل کر سیدھے سروس روڈ پر گر گئی ۔
حادثہ پیش آتے ہی موقع پر موجود لوگوں نے تینوں زخمیوں کو کنداپور کے اسپتال میں داخل کروایا ۔ سمیرا نے اسپتال میں داخلے کے فوری بعد دم توڑ دیا جبکہ منور اور سہیل کو مزید علاج کے لئے منی پال کے اسپتال میں منتقل کیا گیا جہاں منور نے زخموں کی تاب نہ لاتے ہوئے دم توڑ دیا ۔
کنداپور ٹریفک پولیس نے کیس درج کر لیا ہے ۔ مزید تحقیقات جاری ہے ۔
