بھٹکل میں آٹو ڈرائیور کی نعش درخت سے لٹکتی ہوئی پائی گئی؛ خودکشی کا شبہ
بھٹکل 18/اپریل (ایس او نیوز): تینگنگونڈ ی بندرگاہ کے قریب ایک شخص کی لاش برگد کے درخت سے لٹکی ہوئی حالت میں پائی گئی، جس کے تعلق سے پولس کو شبہ ہے کہ اس نے خودکشی کرلی ہے۔
متوفی کی شناخت لکشمن نارائن نائک (40) کے طور پر کی گئی ہے۔ معلوم ہوا ہے کہ وہ ایک آٹو ڈرائیور ہے جو تینگنگونڈی کا رہنے والا ہے۔ وہ اپنا آٹو لے کر بدھ کی رات 8 بجے گھر سے نکلاتھا۔ رات کو گھر واپس نہیں آیا۔ جمعرات کی صبح دیانند وینکٹ رامن نائک نامی شخص نے متوفی کے بھائی کرشنا نائک کو فون کرکے خبر دی کہ لکشمن کی نعش پائی گئی ہے۔ اطلاع ملتے ہی کرشنا جائے وقوع پر پہنچ گیا تو اس نے دیکھا کہ لکشمن نائک تینگنگونڈی بندرگاہ کی طرف واقع ایک برگد کے درخت کی ایک ٹہنی کے ساتھ لٹکا ہوا ہے۔
پتہ چلا ہے کہ مہلوک شادی شدہ تھا اور اس کے دو چھوٹے بچے بھی ہیں۔
بھٹکل مضافاتی پولس تھانہ میں معاملہ درج کیا گیا ہے، پولس معاملے کی جانچ کررہی ہے۔