بی جے پی جیسی جھوٹی پارٹی اس ملک میں کبھی پیدا نہیں ہوئی : ادھو ٹھاکرے
ممبئی، 5/مارچ (ایس او نیوز/ایجنسی) ’’ بی جے پی سے زیادہ جھوٹی پارٹی آج تک نہیں دیکھی گئی۔ اگر آپ کو یقین ہے کہ میں واپس آئوں گا تو پھر دوسروں کی پارٹیاں توڑنے کی کیا ضرورت ہے؟ ‘‘ ان خیالات کا اظہار کیا ہے شیوسینا (ادھو) سربراہ ادھو ٹھاکرے نے۔ وہ رائے گڑھ ضلع میں واقع تلوجہ شہر میں ’ہندو ہردئے سمراٹ بالا صاحب ٹھاکرے لاء کالج‘ کا افتتاح کرنے آئے تھے۔ اس موقع پر ادھو ٹھاکرے نے کہا کہ ان دنوں سماج میں وکیلوں کی کچھ زیادہ ہی ضرورت ہے۔ اس کالج کے کھل جانے کے بعد وکیلوں کی ایک فوج تیار ہوگی۔
اس موقع پر ادھو ٹھاکرے نے کہا’’ جب میں وزیر اعلیٰ تھا تو پنویل کے ایئر پورٹ کا نام ’دیبا پاٹل‘ تجویز کیا گیا تھا لیکن اس کے آگے کیا ہوا؟ اب تک یہ نام کیوں نہیں رکھا گیا؟ ‘‘ انہوں نے کہا کہ ’’ ہم مقامی باشندوں کے جذبات کی قدر کرتے ہیں، ان کے جذبات کے ساتھ کھلواڑ نہیں کرتے۔ ‘‘ شیوسینا (ادھو) سربراہ نے کہا ’’ بی جے پی جیسی جھوٹی پارٹی اس ملک میں کبھی پیدا نہیں ہوئی۔ اگر آپ کو یہ اعتماد ہے کہ ’ میں پھر آئوں گا‘، تو دوسروں کی پارٹیاں توڑنے کی کیا ضرورت ہے؟ ‘‘ ادھو ٹھاکرے نے یاد دلایا کہ ’’اگر شیوسینا نے آپ ( بی جے پی ) کو اپنے کندھے پر بٹھا کر مہاراشٹر میں گھمایا نہ ہوتا تو آج آپ کو کندھا دینے کیلئے ۴؍ لوگ بھی نصیب نہیں ہوتے۔‘‘
انہوں نے کہا کہ ’’ بی جے پی ایک پارٹی نہیں ہے بلکہ ایک سڑی ہوئی تنگ ذہنیت ہے۔ ہمیں اپنے ملک سے اس ذہنیت کو تڑی پار کرنا ہی ہوگا۔‘‘ ادھو ٹھاکرے نے زور دے کر کہا ’’ اس کے بعد..... اس کے بعد ہی ہمارے اچھے دن آئیں گے۔‘‘ انہوں نے حاضرین کو متنبہ کیا کہ ’’ اگلا لوک سبھا الیکشن آمریت بنا م جمہوریت ہوگا۔‘‘ انہوں نے عوام کو خبردار رہنے کی تلقین کی ۔یاد رہے کہ ادھو ٹھاکرے اس وقت ریاست بھر کے دورے پر ہیں۔ انہوں نے رائے گڑھ ضلع میں خاص توجہ دی ہے۔ اس سے قبل وہ پین اور دیگر علاقوں میں ریلیاں منعقد کر چکے ہیں۔