بی جے پی کرناٹک حکومت کو دھمکی دے رہی، نائب وزیر اعلیٰ ڈی کے شیوکمار کا سنگین الزام
بنگلورو، 20/اپریل (ایس او نیوز /ایجنسی) کرناٹک کے نائب وزیر اعلیٰ ڈی کے شیوکمار نے بی جے پی پر سنگین الزام عائد کرتے ہوئے کہا ہے کہ وہ ریاستی حکومت کو دھمکی دے رہی ہے اور لوگوں میں یہ پیغام پہنچانے کی کوشش کر رہی ہے کہ خراب نظم و نسق کی وجہ سے اب ریاست کی کمان گورنر کے حوالے کر دی جائے گی۔
میڈیا کے نمائندوں سے بات کرتے ہوئے نائب وزیر اعلیٰ نے کہا کہ ’’بی جے پی دعویٰ کر رہی ہے کہ وہ ریاست کی کمان گورنر کو سونپ دے گی۔ اس سے کوئی فرق نہیں پڑتا کہ وہ اسے کس طرح پروجیکٹ کرتی ہے لیکن یہاں (کرناٹک میں) یہ سب نہیں چل سکتا۔‘‘ انہوں نے مزید کہا کہ ’’کانگریس لیڈروں کو بی جے پی یہ کہہ کر دھمکی دینے کی کوشش کر رہی ہے کہ ریاست میں امن و امان کی صورتحال پوری طرح سے خراب ہو گئی ہے۔‘‘
نائب وزیر اعلیٰ نے کہا کہ ’’میں بس یہ کہنا چاہوں گا کہ ملک میں امن و امان کی صورتحال سب سے بہتر اگر کہیں ہے تو وہ کرناٹک میں ہے۔‘‘ واضح رہے کہ کرناٹک بی جے پی نے ریاستی حکومت پر ریاست میں امن و امان کی بگڑتی ہوئی صورتحال کے حوالے سے تنقید کی ہے۔ بی جے پی کا کہنا ہے کہ کانگریس کے دور حکومت میں گزشتہ 48 گھنٹوں میں مجرمانہ واقعات میں اضافہ ہوا ہے۔