بینگلورو،  19 / مارچ  (ایس او نیوز) ایسا لگتا ہے کہ اس پارلیمانی الیکشن کےد وران جنتا دل ایس نے بی جے پی کے ساتھ ہاتھ ملا کر جو 'ہنی مون' منانے کا منصوبہ بنایا تھا اس کے رنگ میں بھنگ پڑنا شروع ہوگیا ہے کیونکہ بی جے پی نے ایک طرف ریاست میں انتخابی سرگرمیوں کے کسی بھی مرحلے میں دیوے گوڈا اور کمارا سوامی کو ساتھ میں رکھنے کی ضرورت ہی محسوس نہیں کی ہے تو دوسری طرف جنتا دل ایس کے لئے صرف دو ہی سیٹوں کی گنجائش چھوڑتے ہوئے پارٹی اور باپ بیٹے کو ان کی موجودہ اوقات دکھا دی ہے ۔ 
     
اس سورت حال پر کمارا سوامی کی تلملاہٹ اس وقت سامنے آئی جب بی جے پی کی ریاستی لیڈرشپ اور ہائی کمان کی طرف سے ہو رہی جنتا دل کی درگت کے خلاف  جنتا دل ایس کے الیکشن انچارج اور دیگر لیڈران نے الیکشن سے متعلق میٹنگ کے دوران دیوے گوڈا اور کمارا سوامی کی موجودگی میں پارٹی لیڈرشپ کو آڑے ہاتھوں لیا ۔ اس موقع پر کمارا سوامی نے ایک طرح سے بے بسی کا مظاہرا کرتے ہوئے کہا کہ کیا صرف دو سیٹوں کے لئے ہمیں بی جے پی کے ساتھ ہاتھ ملانے کی ضرورت تھی ۔ جبکہ ہم اپنے طور پر ہی جیتنے کے قابل تھے ۔ 
     
کمارا سوامی نے کہا کہ ریاست کی 18 سیٹوں پر جے ڈی ایس کا اثر ہے وہاں پر بی جے پی کو ہمارا ساتھ لینا چاہیے ۔ بی جے پی نے ریاست کی 20 سیٹوں پر امیدواروں کا اعلان کیا ہے مگر اس تعلق سے ہمیں اعتماد میں نہیں لیا گیا ۔ کولار کی سیٹ جے ڈی ایس کے لئے چھوڑنے کے سلسلے میں بی جے پی ٹال مٹول کر رہی ہے ۔ شروع میں بی جے پی نے ہی کہا تھا کہ کولار، ہاسن، منڈیا سمیت پانچ سیٹیں جے ڈی ایس کے حصے میں آتی ہیں ، لیکن اب دیکھو تو جے ڈی ایس کے لئے صرف 2 سیٹیں باقی رہ گئی ہیں ۔ 
    
میٹنگ کے دوران پارٹی کے لیڈران اور الیکشن انچارج لیڈران نے بی جے پی کی طرف سے جے ڈی ایس کے مفاد کو درکنار کرتے ہوئے اپنے طور پر فیصلے کرنے اور کلبرگی اور دیگر مقامات پر وزیر اعظم نریندرا مودی کے انتخابی جلسوں میں دیوے گوڈا تک کو شامل نہ کیے جانے پر سخت اعتراض جتایا اور پوچھا کہ آخر ایسے اتحاد اور اشتراک کا فائدہ کیا ہے ؟    
    
سابق وزیر اعظم اور جے ڈی ایس سپریمو دیوے گوڈا نے میٹنگ میں موجود اراکین اور لیڈروں کی باتوں کو سننے کے بعد کمارا سوامی کو مشورہ دیا کہ وہ اس مسئلے پر وزیر داخلہ امت شاہ اور بی جے پی کے قومی صدر جے پی ندّا سے بات چیت کریں اور بی جے پی - جے ڈی ایس اتحاد کی راہ میں رکاوٹ بننے والے مسائل کو حل کریں ۔ دیوے گوڈا نے کہا کہ "اگر ضرورت محسوس ہوئی تو میں خود دہلی جا کر اس مسئلہ پر بات چیت کروں گا ۔"
    
اس بدلتے ہوئے سیاسی منظر نامے میں یوں محسوس ہو رہا ہے کہ اقتدار پانے کی ہوس میں دیوے گوڈا اور کمارا سوامی نے اپنے سیکیولر کردار کو داو پر لگاتے ہوئے بی جے پی کے ساتھ ہاتھ ملانے اور ریاست میں کانگریس کو ناکوں چنے چبوانے کا جو خواب دیکھا تھا، شاید وہ چکنا چور ہونے میں دیر نہیں ہے ۔