کاروار میں بائک حادثہ؛ بھٹکل کا ایک نوجوان جاں بحق، دوسرا شدید زخمی
بھٹکل ، 3/ستمبر (ایس او نیوز) بھٹکل سے کاروار جانے کے دوران سڑک حادثے میں ایک نوجوان کی موت واقع ہوگئی جبکہ دوسرا شدید زخمی ہو گیا۔ حادثہ کاروار سے قریب 20 کلومیٹر دور تلور نیشنل ہائی وے پر سنیچر دیر رات قریب 11:30 بجے پیش آیا۔
ذرائع سے ملی اطلاع کے مطابق دونوں نوجوان بائیک پر سوار کسی کام سے کاروار جارہے تھے، کاروار کے بالکل قریب پہنچنے کے بعد حادثہ پیش آیا۔ بتایا گیا ہے کہ راستے میں اچانک ایک جانور سامنے آگیا جس سے ٹکراکر دونوں بائک سے اچھل کر گرے، دونوں کے سر پر شدید چوٹ لگی تھی، راہ چلتے لوگوں نے انہیں اسپتال پہنچایا مگر ایک کی موقع پر ہی موت واقع ہوچکی تھی۔
مرنے والے نوجوان کی شناخت محمد سمیان گنگاولی (32) کی حیثیت سے کی گئی ہے یہ بھٹکل شفا کراس کا رہائشی بتایا گیا ہے۔ مگر بھٹکل میں اس کی میت مدینہ کالونی، مسجد ابوبکر کے قریب واقع اس کے چاچا کے گھر لائی جائے گی۔ زخمی نوجوان کی شناخت تنویر احمد کی حیثیت کی گئی ہے جس کے سر پر شدید چوٹ لگنے کی بنا پر اسے کاروار سے مینگلور اسپتال منتقل کیا گیا ہے۔ تنویر کی حالت بھی بے حد نازک بتائی گئی تھی، مگر پتہ چلا ہے کہ اب وہ خطرہ سے باہر ہے۔ گھر والوں نے اس کی جلد صحتیابی کے لئے دعاؤں کی درخواست کی ہے۔
محمد سمیان کی میت فی الوقت کاروار اسپتال میں ہے، پوسٹ مارٹم کے بعد دوپہر تک بھٹکل پہنچنے کی توقع ہے۔ اللہ اس کی مغفرت فرمائے۔ گھر والوں کو صبر جمیل عطا فرمائے ۔ امین
