بھٹکل:25؍جنوری (ایس او نیوز) بھٹکل تعلقہ انتظامیہ کی جانب سے25جنوری بروزجمعہ  دی نیو انگلش پی یوکالج میں منعقدہ قومی یوم ِ رائے دہندگان کا بھٹکل اسسٹنٹ کمشنر ساجد ملا نے دیا سلائی کے ذریعے اافتتاح کیا۔

اس موقع پر خطاب کرتے ہوئے اے سی نے کہاکہ ملک میں نافذ جمہوری نظام کے متعلق جانکاری حاصل کرنا ہر ایک شہری کا لازمی فریضہ ہے، رائے دہی میں ہماری شرکت ہمارا فرض ہے، انڈین الیکشن کمیشن کا قیام 25جنوری کو  ہوا تھااسی مناسبت سے ہرسال 25جنوری کو قومی یوم ِ رائے دہندگان منایاجاتاہے۔ اس طرح کے پروگراموں کے ذریعے نوجوان ووٹروں میں بیداری پیدا کرنا ، انہیں نئی معلومات فراہم کرنے کے علاوہ  ووٹر شناختی کارڈ کی تقسیم بھی کی جاتی ہے۔ انہوں نے ووٹر شناختی کارڈ کے متعلق جانکاری دیتے ہوئے بتایاکہ کل تک شناختی کارڈ بنانے میں کافی دقتیں تھیں اب اس نظام میں انقلابی تبدیلیاں پید اکرتے ہوئے گھر پہنچ کر شناختی کارڈ بنانے کا نظام جاری کیاگیا ہے عوام اسے استفادہ کرنےکی بات کہی۔

سنتوش ایس پی نے مقالہ نگار کی حیثیت سے ووٹ کی اہمیت ، انتخابی کارروائی وغیرہ کے متعلق تفصیلی جانکاری دی۔ اس موقع پر تعلقہ کے 70نئے ووٹرس کو شناختی کارڈ اور تعلقہ انتظامیہ کی طرف سے منعقدہ ووٹرکوئز مقابلےمیں جیت حاصل کرنے والوں کے درمیان انعامات کی تقسیم کی گئی۔ تحصیلدار وی این باڈکر، تعلقہ پنچایت کارگزار افسر پربھاکر چکنمنے ، چیف آفیسر دیوراج، سی پی آئی کے ایل گنیش،مرڈیشور تھانہ پی ایس آئی بسوراج ، دی نیو انگلش پی یوکالج کے پرنسپال وریندر شانبھاگ موجود تھے۔