بھٹکل : ملّاری میں پتھروں کی کان کنی - کرشر کی اجازت دینے کے خلاف مقامی افراد کا احتجاج
بھٹکل، 2 / مارچ (ایس او نیوز) تعلقہ کے بینگرے گرام پنچایت علاقے میں ملّاری کے مقام پر پتھروں کی کان کنی اور کرشر کی اجازت دینے کے خلاف مقامی لوگوں نے گرام پنچایت دفتر کے باہر پھر ایک احتجاجی مظاہرہ کیا ۔
مظاہرین کا کہنا تھا کہ ملّاری علاقے میں پہلے سے ہی پتھروں کی کان کنی کی وجہ سے زرعی زمینیں خراب اور ماحول آلودہ ہونے کے علاوہ جانوروں کے چارہ اور پینے کے پانی کے مسائل سے عوام کی زندگی مشکلات کا شکار ہوگئی ہے ، ایسے پھر سے کان کنی اور کرشر چلانے کی اجازت دینا کیسے درست ہو سکتا ہے ۔ پتھر نکالنے اور اسے توڑنے کی سرگرمیاں بند کرنے کی بار بار درخواست کے باوجود کوئی بھی اس کی طرف دھیان نہیں دے رہا ہے ۔
اس کے جواب دیتے ہوئے پنچایت ڈیولپمنٹ آفیسر اودیا بورکر نے کہا کہ ملّاری میں پنچایت کی طرف سے نئے سرے سے کسی کو بھی کان کنی یا کرشر چلانے کی اجازت نہیں دی گئی ہے ۔ یہ معاملہ محکمہ ارضیات و معدنیات والے دیکھتے ہیں ۔ وہی لوگ اس کی اجازت منسوخ کر سکتے ہیں ۔