بھٹکل ، 17/اپریل (ایس او نیوز ) مرکزی فطرہ کمیٹی بھٹکل کے زیر اہتمام بھٹکل میں امسال ایک لاکھ دو ہزار کلوسے زائد چاول جمع ہوا اور عیدالفطر کی رات ہی اس کی تقسیم عمل میں آئی، اس سلسلہ میں بھٹکل،ہوناور وکمٹہ،شیرور وآس پاس میں 57حلقے بنائے گئے تھے،جہاں مختلف محلوں سے جمع شدہ فطرہ کی تقسیم عمل میں آئی، ان باتوں کی جانکاری مرکزی فطرہ کمیٹی بھٹکل کے کنوینر مولانا محمد الیاس جاکٹی ندوی نے دی ۔ آزاد نگر مسجد ہُدیٰ میں منعقدہ مرکزی فطرہ کمیٹی کی جائزہ میٹنگ میں معلومات فراہم کرتے ہوئے انہوں نے کہا کہ اس سلسلہ میں حسب سابق بھٹکل کی بیرونی جماعتوں بالخصوص دبئی جماعت سے امسال بھی بڑی مقدار میں چاول موصول ہوا،جسے بھٹکل کے مستحق خاندانوں کے ساتھ ساتھ پڑوسی علاقوں شیرورسے کمٹہ تک کے دو ہزارنو (2009) خاندانوں میں تقسیم کیا گیا،اوسطاً ہر خاندان کو50کلو اور زیادہ سے زیادہ بعض نادار اور معذور بڑے خاندانوں کو ایک کوئنٹل تک چا ول دیا گیا،اس سال تیسری دفعہ بھٹکل وآس پاس کے تمام حلقوں میں باسمتی چاول بھی تمام خاندانوں میں تقسیم کیا گیا، مولانا نے بتایا کہ تقسیم فطرہ کے دائرے کو وسعت دیتے ہوئے شرواتی بیلٹ پر واقع گیر سوپا، ہیرانگڈی، سڑلگی وہوناور وغیرہ کے اطراف کے علاقوں کو بھی گذشتہ دو سال سے اس میں شامل کیا گیا تھا، امسال اس میں منکی ناخدا محلہ کو بھی شامل کیا گیا۔
رپورٹ پیش کرتے ہوئے مولانا نے بتایا کہ حسب سابق امسال بھی تمام حلقوں میں از سر نو سروے کیا گیااور اس سلسلہ میں رمضان المبارک میں فطرہ کمیٹی کی دو مشاورتی نشستیں منعقد ہوئیں،بھٹکل میں اجتماعی طور پر فطرہ کی تقسیم کا یہ مستحسن کام گذشتہ 39سالوں سے جاری ہے اور اس میں ہر سال ترقی ہورہی ہے،اس سلسلہ میں خلیج میں مقیم بھٹکل جماعتوں اور مختلف محلوں واسپورٹس سینٹر وں کے نوجوانوں کے تعاون اور مقامی علماء ونوجوانوں کی خصوصی دلچسپی کوفراموش نہیں کیا جاسکتا۔
بدھ بعد نماز ظہر منعقدہ جائزہ میٹنگ کا آغاز تلاوت کلام پاک سے ہوا، کمیٹی کے نائب کنوینر ایس ایم پرویز نے ااستقبال کرنے کے ساتھ پروگرام کی نظامت کی۔ کنوینر مولانا الیاس جاکٹی ندوی کی طرف سے رپورٹ پیش کئے جانےکے بعد مختلف جماعتوں کے ذمہ داران نے اپنے اپنے تاثرات پیش کئے۔ جماعت المسلمین بھٹکل کے صدر جناب شاہ بندری محمد شفیع نے صدارت کی۔
مولانا مقبول احمد صاحب کوبٹے ندوی (مہتمم جامعہ اسلامیہ بھٹکل)، جناب عتیق الرحمن منیری (سکریٹری جنرل بھٹکل مسلم خلیج کونسل ونائب صدر مجلس اصلاح وتنظیم)، مولوی اعبدالرقیب اایم جے ندوی (جنرل سکریٹری مجلس اصلاح وتنظیم )، جناب قمر سعدا (صدر، بھٹکل کمیونٹی جدہ )، جناب عمران خطیب(نائب صدر بھٹکل مسلم جماعت دبئی )اور مولانا یونس برماور ندوی نے اس موقع پر اپنے خیالات کا اظہار کیا اور ممبران کی ہمت افزائی فرمائی ۔مولانا محمد انصار خطیب مدنی(نائب قاضی جماعت المسلمین بھٹکل) کی دعاپر نشست کا اختتام ہوا۔