بینگلورو، 23/جولائی(ایس او  نیوز)جرائم کی واردات پیش آنے پر فوری ایمرجنسی فون نمبر کی سہولت فراہم کئے جانے کے بعد اب محکمہ پولیس نے ٹرافک مسئلہ اور حادثات پیش آنے پر پولیس کنٹرول روم ہیلپ لائن نمبر”112“ پر فون کرنے کی سہولت مہیا کی ہے،اس سلسلہ میں شہر کے پولیس کمشنر بی دیانند نے اپنے ٹویٹ میں اس بات کی جانکاری دی ہے۔

اپنے ٹوئٹ میں انہوں نے بتا یا کہ چوری، قتل، اذیتیں ، دیگر جرائم سرگرمیوں سمیت نظم وضبط میں خلل پیدا کرنے والے عناصرکے خلاف اور سائبر کرائم پیش آنے پر فوری ہیلپ لائن نمبر”112“پر فون کرنے کا موقع فراہم کیا گیا ہے،اب ٹرافک مسئلہ کو فوری حل کرنے کے مقصد سے اسی ہیلپ لائن نمبر”112“ پر فون کرنے پر پولیس اہلکار فوری موقع پر پہنچ کر مسئلہ کو حل کریں گے۔حادثات، ٹرافک اژدہام، ون وے کی خلاف ورزی، نو پارکنگ پر گاڑیوں کو کھڑ ی کی جانے اور سگنل پر کو ئی گڑ بڑ پر فوری”112“ ہیلپ لائن نمبر پر اطلاع دی جا سکتی ہے،فون کال ملنے کے چند ہی منٹوں میں پولیس اہلکار موقع پر پہنچ کر مسئلہ کو حل کریں گے۔ملیشورم میں حال ہی میں منعقد جنا سمپرک اجلاس کے دوران ایک شہری کے مشورہ پر محکمہ پولیس نے ٹرافک مسئلہ کے حل کے لئے ہیلپ لائن نمبر ”112“ کو عوام کی سہولت کے لئے مہیا کیا ہے۔

پولیس کمشنر نے بتایا ہے کہ ٹرافک مسئلہ کے حل کے لئے اب ہوئیسلا پولیس کی بجائے دو پہیہ والی ”کوبرا“ پولیس فوری موقع پر پہنچ کر مسئلہ کو حل کرنے کی کوشش کرے گی۔