بینگلورو،31 / جنوری (ایس او نیوز) سائبر کرائم پولیس اسٹیشن کی سی سی بی ٹیم نے گھر میں بیٹھے بیٹھے لاکھوں روپے کمانے کا لالچ دینے کے بعد فریب دہی کرنے والے ایک بہت بڑے گروہ کا پردہ فاش کیا اور ایک خاتون سمیت 9 ملزمین کو گرفتار کر لیا۔
    
گرفتار کیے گئے ملزمین کی شناخت ممبئی کے علی خان، امیر سہیل، عنایت خان، نیاز احمد، عادل آغا، سید عباس، متھل عامر سہیل کے علاوہ حیدرآباد کی نینا تارا چند راج، مہیر ششی کانت شاہ اور ستیش کولنگی کے طور پر کی گئی ہے ۔ مزید دو ملزمین مفرور بتائے جاتے ہیں جن کی تلاش جاری ہے۔
    
بتایا جاتا ہے کہ حال میں ودیارنا پور کے ایک شخص کو 'ورک فرام ہوم' کے نام پر 18 لاکھ روپوں کا چونا لگایا گیا تھا ۔ اس معاملے کی تحقیقات کے دوران اے سی پی ستیہ نارائن سنگھ اور انسپکٹر ہجریش کی ٹیم نے اس گروہ کا پتہ لگانے اور ملزمین کو گرفتار کرنے میں کامیابی حاصل کی۔
    
فریب کاروں نے نقلی دستاویزات کی بنیاد پر بینک کھاتے کھولے تھے اور اس میں آن لائن فراڈ سے حاصل کی گئی رقم منتقل کرواتے تھے ۔ پولیس افسران کا کہنا ہے کہ تحقیقات کے دوران  اس بات کا پتہ چلا ہے کہ اس گروہ نے ملک کی 28 ریاستوں میں 2,143  افراد کو لوٹا ہے جس میں بینگلورو کے 135 معاملے شامل ہیں۔ 
    
پولیس کے بیان کے مطابق اس گروہ کے خلاف جتنے معاملے درج ہوئے ہیں اس کی بنیاد پر لوٹی گئی رقم 158 کروڑ روپے بنتی ہے ، مگر تفتیش کے دوران ملزمین کے بینک کھاتے سے صرف 62.83 لاکھ روپے ہی ضبط ہوئے ۔ اس کے علاوہ ملزمین کے قبضے سے جرم انجام دینے کے لئے استعمال کیے گئے 11 موبائل فونس، ایک لیپ ٹاپ، 3 بینک چیک بکس اور 15 سم کارڈس برآمد کیے گئے۔