بنگلورو 22/جنوری (ایس او نیوز) ایودھیا میں پیر کو  پر رام مندر کے افتتاح کے موقع پر  بینگلور میں کرناٹک کے وزیراعلیٰ سدرامیا نے  کہا کہ وہ بی جے پی کے رام کی نہیں بلکہ مہاتما گاندھی کے رام کی پوجا کرتے ہیں۔  مہادیوپورا میں ایک مقامی رام مندر کی نقاب کشائی میں حصہ لیتے ہوئے   سدرامیا نے کہا کہ  "گاندھی کے لیے یہ رگھو پتی راگھو راجہ رام تھے اور  ان کے آخری الفاظ ہائے  رام تھے۔"

واضح رہے کہ  رام مندر کے افتتاح کے موقع پر ایک طرف بی جے پی  کی حکمرانی والی ریاستوں میں عام تعطیل کا اعلان کیا گیا تھا، لیکن کرناٹک میں کانگریس سرکار نے تعطیل دینے سے انکار کیا تھا جس کو لے کر  بی جے پی نے سدارامیا کو ہندو مخالف قرار دیا تھا اور اقلیتوں کے حامی ہونے کی وجہ سے  انہیں سدارام اللہ خان قرار دیا تھا ۔ لیکن سدرامیا نے واضح کیا کہ وہ  مہاتما گاندھی کے  رام کو مانتے ہیں۔

سدرامیا نے کہا کہ "میرے پاس بجٹ کی تیاری کا کام تھا۔ لیکن میں یہاں اس لیے آیا کہ شری ی رام چندر، لکشمن اور  سیتا کا پرتیشٹھا کرنے اور انجنیا مورتی کی نقاب کشائی کرنےکے لئے اپنے تمام کام ملتوی کرکے پہنچاہوں۔سدرامیا نے کہا کہ   "بہت سے لوگ کہتے ہیں کہ سدارامیا ملحد ہیں۔لیکن میں واضح کردوں کہ  میں بھگوان کو ماننے والا ہوں۔ میرے نام میں ہی  رام ہے۔ میں سدارامیا ہوں  ۔ میں نے کبھی بھگوان  کے وجود کی مخالفت نہیں کی۔‘‘ اسی کے ساتھ  سدارامیا نے  'جے شری رام' کا نعرہ لگایا اور ہجوم کو بلند آواز میں کہنے پر مجبور کیا۔ انہوں نے کہا کہ یہ نعرہ کسی کی ملکیت نہیں ہے۔آگے کہا کہ "پوری قوم شری  رام چندر کی پوجا کرتی ہے۔ اپنے گاؤں میں، میں نے رام مندر کی تعمیر کے لیے فنڈ دیا ہے،" سدارامیا نے یاد کرتے ہوئے کہا کہ وہ کس طرح پنے گاؤں میں بھجن میں حصہ لیا کرتے تھے۔

سدارامیا نے کہا کہ تمام مذاہب  میں انسانیت کی بھلائی پر زور دیا گیا ہے۔ "گاندھی سمیت سبھی نے رام راجیہ کی بات کی تھی۔ کویمپو نے کہا تھا  کہ رام راجیہ میں  پوری ملک  تمام  انسانیت کے لیے امن کا باغ ہوگا۔ اسی لیے آئین بقائے باہمی اور ہم آہنگی کی بات کرتا ہے۔ ہمیں ایک دوسرے سے نفرت کیے بغیر انسانیت کے ساتھ رہنا چاہیے۔"