بینگلورو، 20/جولائی (ایس او نیوز/ایجنسی) ریاستی وزیر برائے ٹرانسپورٹ رام لنگا ریڈی نے کہا کہ ریاست میں ہر سال سڑک حادثات اور اس سے ہونے والے اموات میں اضافہ ہی ہونے لگا ہے۔بینگلور۔میسور ایکسپرس وے کوغیر سائنٹفک طریقے سے تعمیر کئے جانے کی وجہ سے اب تک اس شاہراہ میں 150سے زیادہ حادثات پیش آئے ہیں۔ریاستی قانون ساز کونسل میں جانکاری دیتے ہوئے انہوں نے کہا کہ سڑک کا تعمیری کام مکمل ہونے سے قبل ہی کھول دیا گیا تھا۔

انہوں نے کہا کہ غیر سائنٹفک طریقے سے سڑک تعمیر کئے جانے کے نتیجہ میں حادثات پیش آنے لگے ہیں۔ کرناٹک اسٹیٹ روڈ سیفٹی اتھارٹی ترمیمی بل۔2023کو پیش کر کے اراکین کونسل سے صلاح ومشورہ حا صل کرنے کے بعد وزیر ٹرانسپورٹ نے کہا کہ اگرسائنٹفک طریقے سے روڈ کی تعمیر کی جاتی تو حادثات پیش نہ آتے۔ ایک طرف سڑکیں خستہ اور دوسری جانب تیز رفتار گاڑیاں دوڑانے کی وجہ سے حادثات پیش آرہے ہیں۔

انہوں نے بتا یاکہ2020کے دوران 39,292سڑک حادثات پیش آئے ہیں،جس میں 9,760افراد کی موت ہو ئی ہے، 2021کے دوران 34,467سڑک حادثات میں 40ہزار سے زیادہ افراد زخمی ہو ئے ہیں، جبکہ 10ہزار افراد نے اپنی جان گنوائی ہے۔ 2022کے دوران جملہ39ہزارسڑک حادثات پیش آئے تھے،جس میں 48ہزار سے زیادہ افراد زخمی اور 11,700 افراد کی موت ہو ئی تھی۔ انہوں نے بتا یا کہ مقررہ وزن سے زیادہ مقدار میں سامان کو لادنے والی گاڑیوں پر محکمہ ٹرانسپورٹ اور محکمہ پو لیس کے اہلکار کڑی نظر رکھے ہو ئے ہیں۔انہوں نے بتا یا کہ روڈ سیفٹی کے متعلق عوام اورگاڑیوں کے ڈرائیوروں میں بیداری پیدا کی جائے گی۔ سڑکوں کے کھڈوں کو بند کرنے سمیت دیگر تعمیری کاموں پر زور دیا جائے گا،اسی مقصد سے کرناٹک اسٹیٹ روڈ سیفٹی اتھارٹی ترمیمی بل۔ 2023پیش کی گئی ہے۔اسمبلی میں کرناٹک اسٹیٹ روڈ سیفٹی اتھارٹی ترمیمی بل۔ 2023 کومنظوری ملنے کے بعد قانون ساز کونسل میں مذکورہ بل کو منظوری دی گئی۔

اراکین کونسل تیجسونی گوڈا، تپے سوامی، وائی اے نارائن سوامی، ایم ناگراج، روی کمار،ٹی اے شرونا،چھلاوادی نارائن سوامی سمیت کئی اراکین نے بل پر بحث میں حصہ لیا،جس کے بعد کونسل کے ڈپٹی چیرمین ایم کے پرانیش نے صوتی ووٹ کے ذریعہ بل کومنظورکیا۔