نئی دہلی، 8 اگست(ایس او نیوز/آئی این ایس انڈیا) آرٹیکل 370 ہٹانے سے پاکستان اتنا بوکھلا گیا ہے کہ وہ ایک کے بعد ایک مسلسل بے تکے قدم اٹھا رہا ہے۔ہندوستان کے ساتھ تعلقات کو گھٹانے اور پاکستان میں ہندوستان کے سفیر کو واپس بھیجنے کے بعد پاکستان نے سمجھوتہ ایکسپریس کو واہگہ سرحد پر ہی روک دیا ہے۔رپورٹ کے مطابق، آج پاکستان سے سمجھوتہ ایکسپریس کو واپس آنا تھا، لیکن پاکستان نے اسے واہگہ سرحد پر روک دیا۔اس سے بہت سے لوگ واہگہ سرحد پر پھنس گئے۔اس کے علاوہ پاکستان نے ہندوستانی فلموں پر بھی پابندی لگا دی ہے۔دریں اثنا،ہندوستان نے واہگہ بارڈر پر رکے ٹرین کو لانے کے لئے اپنا ڈرائیور اور انجن بھیجا۔پاکستان نے ہندوستان کی سرحد میں اپنے گارڈ اور ڈرائیور کو بھیجنے سے انکار کر دیا۔اس نے ہندوستان سے کہا کہ وہ اپنا ڈرائیور اور گارڈ بھیجے۔پاکستان کی اس حرکت سے مسافر ٹرین میں کشمکش کی حالت میں پھنس گئے۔ہندوستان نے بعد میں کہا کہ وہ اپنا گارڈ اور ڈرائیور بھیج کر ٹرین کو اپنی سر حد میں لے آئے گا۔اس نے پلوامہ حملے کے جواب میں ہندوستان کی جانب سے ہوئے ایئر اسٹرائیک کے بعد بھی سمجھوتہ ایکسپریس کی نقل و حرکت روک دی تھی، جسے گزشتہ 4 مارچ کو بحال کیا گیا تھا،اب اس نے پھر سے اسے روکنے کا اعلان کیا۔اس نے بدھ کو ہندوستان کے ساتھ تجارت روکنے اور سفارتی تعلقات میں کمی کا اعلان کیا تھا۔