لکھنؤ،24؍نومبر (ایس او نیوز؍یو این آئی)  اترپردیش کانگریس کے صدر اجے کمار للو نے پیر کو بتایا کہ کورونا سے نمٹنے کے لئے خریدے گئے پی پی ای کٹ میں کئے گئے کروڑوں روپئے کے گھپلے کے ملزم افسران کی ایس آئی ٹی جانچ رپورٹ عوامی پلیٹ فارم پر رکھے بغیر کی گئی تعیناتی سے بدعنوانی پر زیرو ٹولرنس کا دعویٰ کرنے والی یوگی حکومت کی قلعی ایک بار پھر ریاستی عوام کے سامنے کھل کر آگئی ہے۔

اجے للو نے کہا کہ بدعنوانی پر بار بار زیرو ٹولرنس کا جھوٹا وعدہ کرنے والی یوگی حکومت کے ذریعہ عالمی وبا کورونا سے نمٹنے کے لئے پی پی ای کٹ باہر سے منگائی گئی تھی۔ اس میں بڑے پیمارنے پر بدعنوانی کے معاملے اجاگر ہوئے۔ کانگریس نے جب اس پر ایوان سے سڑک تک زور وشور سے آواز بلند کی اور اسمبلی میں سوال اٹھایا تو دباؤ میں آئی یوگی حکومت نے اس وقت بدعنوانی پر زیرو ٹولرنس کی پالیسی کا حوالہ دیتے ہوئے ایوان کو یہ بھروسہ دیا تھا کہ بدعنوانی کے ملزم دس ڈسٹرکٹ مجسٹریٹ کو ان کے عہدوں سے ہٹایا جارہا ہے۔اس معاملے میں ایس آئی ٹی جانچ کرانے کا بھی تیقن دیا گیا تھا۔

یو پی کانگریس صدر نے کہا کہ اب جو حقائق سامنے آرہے ہیں اس کے مطابق گھوٹالوں کے سبھی ملزمین کو ایک ایک کر کے تعینات کیا جاچکا ہے، جبکہ ابھی تک حکومت نے ایس آئی ٹی جانچ رپورٹ کو عوامی ڈومین میں نہیں رکھا ہے۔بغیر عوامی سطح پر رپورٹ کو رکھے کارروائی کا اعلان کئے بغیر ملزم افسران کو نئے سرے سے تعیناتی اس بات کا ثبوت ہے کہ حکومت کا بدعنوانوں کو پورا تحفظ حاصل ہے، اور حکومت اس بدعنوانی میں پوری طریقے سے ملوث ہے۔