بھٹکل شمس الدین سرکل سے ڈرینیج پائپ لائن نشیبی علاقے میں موڑنے کا مسئلہ - اے سی نے تشکیل دی جائزہ کمیٹی
بھٹکل, 3 / مارچ (ایس او نیوز) شہر کے شمس الدین سرکل علاقے سے ڈرینیج پائپ لائن کو نشیبی علاقے کے غوثیہ اسٹریٹ میں واقع ویٹ ویل سے جوڑنے کے خلاف ٹی ایم سی کاونسلرس کے احتجاج کے بعد وقتی طور پر کام روک دیا گیا تھا ۔
اس ضمن میں اسسٹنٹ کمشنر کی صدارت میں افسران کی ایک میٹنگ منعقد ہوئی جس میں ڈرینیج پائپ لائن کو بچھانے کے تعلق سے جائزہ لینے کے لئے ایک کمیٹی تشکیل دی گئی ۔
اسسٹنٹ کمشنر ڈاکٹر نینا کے دفتر میں منعقدہ میٹنگ میں بتایا گیا ہے کہ اس سے قبل اوپری علاقے کے ڈرینیج کو وینکٹاپور میں موجود ویٹ ویل سے جوڑا گیا تھا ۔ اب نیشنل ہائی وے کی توسیعی منصوبے میں ٹھیکیدار کمپنی آئی آر بی نے ڈرینیج پائپ لائن کو نشیبی علاقے کی طرف موڑتے ہوئے دوبارہ غوثیہ اسٹریٹ کے ویٹ ویل سے جوڑنے کی تیاری کی ہے ۔ اس وقت نشیبی علاقے میں موجود پمپنگ اسٹیشن، ڈرینیج کے گندے پانی کو پمپ کرنے میں ناکام رہنے کی وجہ سے گندہ پانی ندی میں چھوڑا جا رہا ہے ، جس کی وجہ سے ندی پوری طرح آلودہ ہوگئی ہے ۔ اس وجہ سے اوپری علاقے کا گندہ پانی نشیبی علاقے میں چھوڑنے کے خلاف احتجاج کرتے ہوئے ٹی ایم سی کاونسلرس نے شمس الدین سرکل پر چل رہے کام کو رکوایا ہے ۔
اس پر وضاحت پیش کرتے ہوئے آئی آر بی والوں نے بتایا کہ سابقہ میونسپل چیف آفیسر اور انجینئر کے علم میں لانے کے بعد ہی نقشے کے مطابق ڈرینیج پائپ لائن بچھانے کا کام کیا جا رہا ہے ۔ اب تک رنگین کٹہ سے ڈرینیج پائپ لائن کا رخ نشیبی علاقے کی طرف موڑتے ہوئے چیمبر وغیرہ تعمیر کیے جا چکے ہیں ۔ اب دوبارہ اس کا رخ بدلنا ممکن نہیں ہے ۔
افسران سے جانکاری حاصل کرنے کے بعد اسسٹنٹ کمشنر نے ایک کمیٹی تشکیل دی جو اس بات کا جائزہ لے گی کہ اوپری علاقے کے گندے پانی کو کس رخ پر جانا چاہیے ۔ ایک ہفتے کے اندر اس کمیٹی کی رپورٹ حاصل کرنے کے بعد اگلا فیصلہ کرنا طے پایا ۔
میٹنگ میں ٹی ایم سی چیف آفیسر نیل کنٹھ میستا، انجینئر اروند، ڈرینیج اینڈ واٹر سپلائی انجینئر اجئے اور آئی آر بی کے انجینئر سدیش شیٹی وغیرہ موجود تھے ۔