عام آدمی پارٹی کا دفتر’سیٖل‘ ، الیکشن کمیشن سے شکایت کی جائیگی
نئی دہلی، 24/ مارچ (ایس او نیوز /ایجنسی) دہلی کے وزیر اعلیٰ اروند کیجریوال کی گرفتاری کے بعد عام آدمی پارٹی کا دہلی کا دفتر سیل کردیا گیا ہے جس پر پارٹی کے دیگر لیڈروں نے شدید اعتراض کیا ہے۔ اس تعلق سے پارٹی نے الیکشن کمیشن سے ملاقات کا وقت مانگا ہے تاکہ لوک سبھا انتخابات میں تمام پارٹیوں کے لئے برابری کو یقینی بنانے کے لئے گفتگو کی جاسکے۔ ضابطۂ اخلاق کے نفاذ کے بعد بھی عام آدمی پارٹی کے دفتر کو پولیس نے گزشتہ روز دن بھر سیل رکھا تھا اورسنیچر کو بھی پولیس نے عام آدمی پارٹی کے لیڈروں کودفتر میں جانے سے روکا۔ہر شخص کو پارٹی دفتر جانے سے روک دیا گیا۔ اس کی وجہ سے آپ کے لوک سبھا امیدوار اور پارٹی لیڈر انتخابی میٹنگ کے لئے پارٹی دفتر نہیں جا سکے۔ دوپہر کے وقت پولیس نے بھاری رکاوٹیں لگا کر پارٹی دفتر جانے والے راستے بند کر د ئیے تھے اورآپ لیڈروں کی تمام درخواستوں کے باوجود پولیس نے کسی کو بھی عام آدمی پارٹی کے دفتر جانے کی اجازت نہیں دی۔آپ لیڈر آتشی، سوربھ بھاردواج، درگیش پاٹھک سمیت کئی لیڈروں کو عام آدمی پارٹی کے دفتر جانے سے روک دیا گیا۔
پولیس کی اس حرکت پر آتشی اور سوربھ بھردواج نے پریس کانفرنس کا انعقاد کیا جس میں انہوں نے کہا کہ آنے والے دنوں میں لوک سبھا انتخابات ہیں۔ ایسے میں ہمیں الیکشن سے متعلق تیاریاں کرنی ہیں، اہم میٹنگیں کرنی ہیں، حکمت عملی بنانی ہے لیکن ایک قومی پارٹی کے دفتر کو چاروں طرف سے روک دیا گیا ہے اور پارٹی کے سینئر لیڈروں کو بھی دفتر میں داخل نہیں ہونے دیا جا رہا ہے۔ آپ کی سینئر لیڈر آتشی نے دعویٰ کیا کہ دہلی میں پارٹی کا دفتر سبھی طرف سے ’سیل‘ کر دیا گیا ہے۔ اس معاملے کی پارٹی انتخابی کمیشن کے سامنے شکایت کرے گی۔ آتشی نے سوشل میڈیا پلیٹ فارم ’ایکس‘ پر ایک پوسٹ میں پارٹی دفتر کو سیل کرنے پر سوال اٹھاتے ہوئے کہا کہ یہ آئین کے ذریعہ دیے گئے ’یکساں مواقع‘ کی خلاف ورزی ہے۔ آتشی کا کہنا ہے کہ لوک سبھا انتخاب کے دوران ایک قومی پارٹی کے دفتر کو کس طرح بند کیا جا سکتا ہے؟ یہ ہندوستانی آئین میں دیے گئے ’یکساں مواقع‘ کے خلاف ہے۔ ہم اس کے خلاف شکایت کرنے کے لیے الیکشن کمیشن سے وقت مانگ رہے ہیں۔آپ کے ایک دیگر سینئر لیڈر اور دہلی حکومت میں وزیر سوربھ بھاردواج نے الزام لگایا کہ مرکزی حکومت نے پارٹی دفتر کے سبھی داخلی دروازے بند کر د یے ہیں۔ انھوں نے ایکس پر لکھا ہے کہ ہم الیکشن کمیشن جائیں گے، مرکزی حکومت نے انتخابی ضابطہ اخلاق نافذ رہتے ہوئے بھی آئی ٹی او پرپارٹی کے صدر دفتر کے سبھی داخلی دروازے بند کر دیے ہیں۔
آتشی نے کہا کہ انہوں نے کہاکہ عام آدمی پارٹی کو انتخابات کی تیاری سے روکنے کے لئے ہمارے لیڈروں کو حراست میں لینے کی کوشش کی جا رہی ہے۔ مختلف ایجنسیوں کا استعمال کرکے ہمیں الیکشن سے روکنے کی کوشش کی جارہی ہے ۔ ہمارے ایم ایل اے گلاب سنگھ پر آئی ٹی کا چھاپہ اس کی ایک مثال ہے۔ عام آدمی پارٹی نے الیکشن کمیشن سے اس پورے واقعہ کا نوٹس لینے کا مطالبہ کیا ہے اور فوری طور پر الیکشن کمیشن سے ملاقات کا وقت بھی مانگا ہے۔ الیکشن کمیشن سے شکایت کرتے ہوئے عام آدمی پارٹی نے کہاکہ آج ہمارے ایک ایم ایل اے گلاب سنگھ `مٹیالا پر سینٹرل ایجنسیوں (آئی ٹی) نے چھاپہ مارا ہے۔ اس سلسلے میں عام آدمی پارٹی نے پورے واقعہ پر فوری کارروائی کا مطالبہ کیا اور تمام ایجنسیوں کو ضابطہ اخلاق کے نافذ ہونے کے دوران تحمل سے کام لینے کو کہا۔ واضح رہے کہ جمعرات کو کیجریوال کی گرفتاری کے بعد انہیں ۲۸؍ مارچ تک ای ڈی کی حراست میں بھیج دیا گیا ہے۔