نئی دہلی، 20؍نومبر (ایس او نیوز؍ایجنسی ) دہلی کانگریس کے ریاستی صدر چودھری انیل اور کانگریس لیڈر ابھیشیک دت نے کہا ہے کہ ایل جی کو نوٹس لیتے ہوئے ستیندر جین کو تہاڑ جیل سے کسی دوسری جیل میں منتقل کرنا چاہئے اور اروند کجریوال کو استعفیٰ دینا چاہئے۔ ریاستی کانگریس صدر نے کہا کہ عام آدمی پارٹی نے دہلی اور دہلی کی سیاست دونوں کو آلودہ کر دیا ہے۔ انہوں نے کہاکہ ہم پہلے ہی سے کہہ رہے ہیں کہ یہ بہت بدعنوان پارٹی ہے۔ستیندر جین کی ویڈیو پر تبصرہ کرتے ہوئے دہلی پردیش کانگریس کے صدر چودھری انیل نے کہا ہے کہ ویڈیو دیکھ کر یہ کہا جا سکتا ہے کہ عام آدمی پارٹی بدعنوان اور گھوٹالہ باز پارٹی بن چکی ہے۔

اب تک یہ لوگ ٹھگ سکیش چندرشیکھر کو جیل کی خدمات فراہم کر رہے تھے، مجرموں کو خدمات فراہم کر رہے تھے اور اب خود جیل کی خدمات لے رہے ہیں۔ کانگریس لیڈر نے کہا کہ بی جے پی نے 15 سالوں میں دہلی میونسپل کارپوریشن کو انتہائی بدعنوان محکمہ بنا دیا ہے۔چودھری انیل نے عام آدمی پارٹی اور بی جے پی دونوں پر طنز کرتے ہوئے کہا کہ دونوں نے دہلی کی سیاست اور دہلی کو آلودہ کر دیا ہے۔ کانگریس لیڈر نے کہاکہ آج ہم ایک ویڑن دستاویز جاری کر رہے ہیں کہ دہلی کو کیسے چمکتی ہوئی دہلی بنائیں گے، شیلا جی کی دہلی بنائیں گے، کانگریس کی دہلی بنائیں گے۔

ستیندر جین کی ویڈیو منظر عام پر آنے کے بعد کانگریس لیڈر ابھیشیک دت نے بھی عام آدمی پارٹی اور اروند کیجریوال پر تنقید کی ہے۔ ابھیشیک دت نے کہا کہ تہاڑ جیل سے بدعنوان وزیر اعلیٰ کے بدعنوان وزیر کی ویڈیو منظر عام پر آئی ہے۔ اروند کجریوال کا ایک ملزم وزیر جیل کے اندر مساج کرا رہا ہے، ایل جی کو فوری طور پر اس کا نوٹس لینا چاہئے اور ستیندر جین کومزیدسخت سزادینی چاہیے۔