کسانوں کی شہادت نہیں ، ٹریکٹر ریلی کی وجہ سے حکومت شرمندہ؟ راہل گاندھی کاتیکھاسوال
نئی دہلی،14؍جنوری(آئی این ایس انڈیا) کسانوں کے احتجاج کا آج 49 واں دن ہے۔ نئے زرعی قوانین کی واپسی کا مطالبہ کرتے ہوئے پنجاب سمیت متعددریاستوں کے کسان دہلی کی سرحد پرجمے ہوئے ہیں۔ اپوزیشن جماعتیں کسانوں کے ساتھ کندھے سے کندھاملاکرکھڑی ہیں۔ اس تحریک کے دوران اب تک 60 سے زیادہ کسان ہلاک ہوچکے ہیں۔
کانگریس کے سابق صدرراہل گاندھی کسان تحریک کے معاملے پر مودی سرکار پر حملہ آور ہیں۔ اب سے کچھ دیر پہلے انھوں نے ایک بار پھر ٹویٹ کرکے مرکز کو نشانہ بنایا ہے۔راہل گاندھی نے ٹویٹ کیا ہے کہ مودی سرکار کو 60 سے زیادہ کسانوں کی شہادت سے شرمندگی نہیں ہے، لیکن وہ ٹریکٹر ریلی سے شرمندہ ہے۔ ایک اور ٹویٹ میں راہل گاندھی نے کہاہے کہ کیا ان لوگوں سے انصاف کی توقع کی جاسکتی ہے جنھوں نے زرعی مخالف قوانین کی حمایت کی ہے۔ یہ جدوجہدکسان مخالف قوانین کے خاتمے تک جاری رہے گی۔