گجرات کے وڈوڈرا جھیل میں کشتی الٹنے سے 14 طلباء سمیت 16 کی موت؛ غرق طلبہ کی تلاش کے لئے سرچ آپریشن جاری
وڈودرا 18 جنوری (ایس او نیوز) گجرات کے وڈودرا کے مضافات میں واقع ہرنی جھیل میں ایک کشتی اُلٹنے سے 14 اسکولی بچوں سمیت 16 افراد کی موت واقع ہو گئی۔واردات جمعرات کو پیش آئی۔ پتہ چلا ہے کہ کشتی پر 27 طلباء اپنے اساتذہ کے ساتھ پکنک پر نکلے تھے۔
ذرائع سے ملی اطلاع کے مطابق جھیل میں غرق ہونے والے دس طلبہ کو بچالیا گیا ہے، مزید لاپتہ طلباء کی تلاش کے لیے سرچ آپریشن جاری ہے۔ گجرات کے وزیر تعلیم کوبیر دینڈور نے بتایا کہ تلاشی مہم کے لیے این ڈی آر ایف اور فائر بریگیڈ کے اہلکاروں کو تعینات کر دیا گیا ہے۔
اُدھر دوسری طرف وڈودرا کے چیف فائر آفیسر پارتھ برہمبھٹ کے حوالے سے بتایا گیا ہے کہ "اسکول کے طلباء کو لے کر جانے والی ایک کشتی، جو یہاں پکنک پر آئی تھی، ہرنی جھیل میں شام کو اُلٹ گئی۔ فائر بریگیڈ نے اب تک سات طلباء کو بچا لیا ہے، جبکہ لاپتہ افراد کی تلاش جاری ہے۔"
بتایا گیا ہے کہ فائر بریگیڈ کے عملے کے موقع پر پہنچنے سے پہلے کچھ مقامی لوگوں نے کچھ بچوں کو بچا لیا تھا جنہیں مختلف اسپتالوں میں داخل کیا گیا ہے۔
وڈودرا کے ایم پی رنجن بین دھننجے بھٹ نے بتایا کہ جو بھی اس حادثہ کا ذمہ دار ہے اس کے خلاف سخت کارروائی کی جائے گی، ان کے مطابق کشتی میں گنجائش سے زیادہ لوگ سوار تھے، جس کے نتیجے میں کشتی الٹ گئی۔
اطلاعات کے مطابق کچھ اساتذہ کے ساتھ طلباء پانی گیٹ کے نیو سن رائز اسکول کے تھے، وہ تقریباً سہ پہر 4.30 بجے جھیل پر پکنک کے لیے آئے تھے اور ایک کشتی پر سوار ہوئے تھے۔ کشتی میں بظاہر 16 افراد کے بیٹھنے کی گنجائش تھی لیکن اس میں 27 افراد سوار تھے۔ بعض میڈیا رپورٹوں کے مطابق بوٹ پر لائف جیکٹ نہیں تھی، جبکہ بعض میڈیا رپورٹوں کے مطابق ابھی تک یہ معلوم نہیں ہو سکا ہے کہ آیا انہوں نے لائف جیکٹس پہنی تھیں یا نہیں۔