وینکوور ، 8/جولائی (ایس او نیوز/ایجنسی)’فیفا عالمی کپ 2026‘ میں ہر مرحلہ کوئی نہ کوئی تاریخ رقم کر رہا ہے۔ اس بار کئی ٹیموں نے برسوں پرانے زخم کو بھرا ہے۔ پری کوارٹر فائنل کے اپنے میچ میں ارجنٹائنا کے خلاف مصر بھی ایسا کرنے کے بہت قریب پہنچ کر چوک گئی۔ حالانکہ اس مرحلہ کے آخری میچ میں سوئٹزرلینڈ نے 72 برس کا انتظار ختم کر دیا۔ کولمبیا کے خلاف مقابلہ میں سوئٹزرلینڈ نے پنالٹی شوٹ آؤٹ میں 4-3 سے کامیابی حاصل کی اور 1954 کے بعد پہلی بار کوارٹر فائنل میں جگہ بنائی۔ سوئٹزرلینڈ کی فتح کے ہیرو تقریباً ساڑھے 6 فٹ قد والے گول کیپر گریگور کوبیل رہے، جنہوں نے شوٹ آؤٹ میں ایک اہم پنالٹی بچائی۔

وینکوور میں کھیلا گیا یہ مقابلہ ’راؤنڈ آف 16‘ کا آخری مقابلہ تھا۔ اس میچ کے فاتح کے ساتھ ہی کوارٹر فائنل کی لائن اپ مکمل ہونی تھی۔ لیکن اس میچ کے فاتح کا فیصلہ ہونے میں تقریباً ڈھائی گھنٹے لگ گئے۔ اپنے چند اہم اسٹار کھلاڑیوں کے بغیر میدان میں اتری دونوں ٹیمیں پورے میچ میں کوئی گول کرنے میں کامیاب نہ ہو سکیں۔ جنوبی امریکی ٹیم کولمبیا نے اپنے یورپی حریف پر مسلسل دباؤ بنائے رکھا، لیکن مقررہ 90 منٹ کے کھیل میں وہ ایک بھی گول نہ کر سکی۔ اس کی بڑی وجہ سوئس گول کیپر گریگور کوبیل رہے، جنہوں نے ابتدائی 90 منٹ میں 2 شاندار بچاؤ کیے۔ دوسری جانب سوئٹزرلینڈ نے بھی چند مواقع پیدا کیے، لیکن وہ بھی انہیں گول میں تبدیل نہ کر سکی۔ اس کے بعد میچ اضافی وقت میں گیا، جہاں مزید 30 منٹ تک بھی دونوں ٹیمیں گول کرنے میں ناکام رہیں۔ ایک بار پھر کوبیل نے شاندار کھیل کا مظاہرہ کرتے ہوئے کولمبیا کے حملوں کو ناکام بنا دیا۔ مجموعی طور پر 120 منٹ کے کھیل میں کولمبیا نے سوئٹزرلینڈ کے گول پر 15 حملے کیے، جن میں سے صرف 3 شاٹس ہی ہدف پر رہے، مگر تینوں کو گول کیپر نے ناکام بنا دیا۔

آخرکار فیصلہ پنالٹی شوٹ آؤٹ میں ہوا اور یہی لمحہ سب سے زیادہ خاص ثابت ہوا۔ سوئٹزرلینڈ کے 28 سالہ گول کیپر گریگور کوبیل پہلی بار کسی پنالٹی شوٹ آؤٹ کا حصہ بن رہے تھے۔ اعداد و شمار کے مطابق اس میچ سے پہلے وہ اپنے پیشہ ورانہ کیریئر میں 57 پنالٹی شاٹس کا سامنا کر چکے تھے، جن میں سے صرف 10 کو ہی روکنے میں کامیاب ہوئے تھے۔ لیکن اپنے پہلے ہی بین الاقوامی شوٹ آؤٹ میں وہ ٹیم کے ہیرو بن گئے۔

کولمبیا کی جانب سے دوسری ہی پنالٹی پر ڈیونسن سانچیز ناکام رہے اور ان کا شاٹ گول پوسٹ سے ٹکرا گیا۔ دوسری طرف سوئٹزرلینڈ کی جانب سے تیسری پنالٹی لینے والے مینوئل اکانجی بھی کامیاب نہ ہو سکے۔ ابتدائی 3-3 پنالٹیز کے بعد اسکور 2-2 سے برابر تھا۔ پھر کولمبیا کی چوتھی پنالٹی فیصلہ کن ثابت ہوئی۔ کوچو ہرناندیز کی اس پنالٹی کو گول کیپر کوبیل نے شاندار ڈائیو لگا کر روک دیا، جس کے بعد سوئٹزرلینڈ نے اپنی اگلی دونوں پنالٹیز کامیابی سے گول میں تبدیل کرتے ہوئے شوٹ آؤٹ 4-3 سے جیت لیا اور 72 برس بعد کوارٹر فائنل میں جگہ بنا لی۔