بنگلورو، 20 مئی (ایس او نیوز) کرناٹک میں کانگریس حکومت نے اپنے اقتدار کے دو سال مکمل ہونے پر ایک اہم عوامی اعلان کرتے ہوئے ریاست کے غریب اور بے زمین خاندانوں کو زمین کا مالکانہ حق دینے کا وعدہ کیا ہے۔ یہ اعلان کانگریس کے سینئر رہنما اور لوک سبھا میں قائدِ حزب اختلاف راہول گاندھی نے ہوسپیٹ میں منعقدہ "سمرپن سنکلپ سمیلن" اور بنگلورو میں حکومت کی دو سالہ تکمیل کے موقع پر ہونے والی تقریب میں کیا۔
راہول گاندھی نے کہا کہ کانگریس حکومت اب چھٹی گارنٹی کے طور پر "بھومی گارنٹی" اسکیم کے تحت ریاست کے تمام غریب خاندانوں، خاص طور پر دلت، آدی واسی، پسماندہ طبقات اور دیگر بے زمین شہریوں کو زمین پر ان کا مالکانہ حق دے گی۔ انہوں نے کہا کہ حکومت کا مقصد یہ ہے کہ ریاست میں کوئی بھی شہری ایسا نہ رہے جس کے پاس اپنی رہائش کی زمین کا قانونی حق نہ ہو۔
انہوں نے انکشاف کیا کہ ریاست میں بڑی تعداد میں لوگ ایسی زمینوں پر برسوں سے رہائش پذیر ہیں جن پر ان کا قانونی قبضہ تسلیم نہیں کیا گیا ہے، جس کی وجہ سے انہیں سرکاری اسکیموں کا فائدہ نہیں مل پا رہا۔ کانگریس حکومت اب ان شہریوں کو مالکانہ حقوق دینے کے لیے 2000 نئے ریونیو دیہاتوں کا قیام عمل میں لا چکی ہے، اور مزید 500 دیہات کا اعلان کیا جائے گا۔
راہول گاندھی نے کہا:"ہم نے انتخابی وعدے کیے تھے کہ جو پیسہ آپ کا ہے، وہ آپ کو لوٹایا جائے گا۔ ہم نے پانچ گارنٹی اسکیمیں پوری کیں — خواتین کو 2000 روپے ماہانہ امداد، مفت بجلی، مفت بس سفر، مفت راشن، اوریووا ندھی اسکیم — اور اب چھٹی گارنٹی زمین کا حق ہے۔"انہوں نے مزید کہا کہ ابتدائی طور پر 1 لاکھ خاندانوں کو زمین کا مالکانہ حق دیا جائے گا، اور آئندہ 6 ماہ میں مزید 50 ہزار خاندانوں کو اس فہرست میں شامل کیا جائے گا۔ حکومت ہر گاؤں میں "گارنٹی کمیٹیاں" تشکیل دے گی، جو اس عمل کو شفاف اور منصفانہ انداز میں مکمل کریں گی۔
راہول گاندھی نے اس موقع پر بی جے پی پر سخت تنقید کی اور کہا کہ"بی جے پی حکومتیں عوام کے پیسے کو چند امیر صنعت کاروں کو دے دیتی ہیں، جبکہ کانگریس حکومت براہ راست عوام کو فائدہ پہنچا رہی ہے۔"انہوں نے یہ بھی واضح کیا کہ "ڈیجیٹل رجسٹری" کے ذریعے زمین کے ریکارڈ کو 21ویں صدی کے تقاضوں کے مطابق ڈیجیٹلائز کیا جائے گا تاکہ شفافیت اور قانونی اعتبار کو فروغ دیا جا سکے۔یہ اعلان نہ صرف کانگریس کی انتخابی گارنٹیوں کی تکمیل کی سمت ایک بڑا قدم ہے بلکہ ریاست کے سماجی و اقتصادی ڈھانچے میں مثبت تبدیلی کی امید بھی پیدا کر رہا ہے، خاص طور پر ان طبقات کے لیے جو دہائیوں سے زمین کے مالکانہ حق سے محروم رہے ہیں۔