چتردرگہ، 28 اگست (ایس او نیوز/ایجنسی): کرناٹک میڈیا اکیڈمی کے زیر اہتمام محکمۂ اطلاعات و رابطۂ عامہ، کرناٹک ایس سی/ایس ٹی اخباری مدیران ایسوسی ایشن اور چتردرگہ ڈسٹرکٹ ورکنگ جرنلسٹس ایسوسی ایشن کے اشتراک سے 30 اگست کو "میڈیا میں امبیڈکر کا نظریہ" کے موضوع پر ایک روزہ سمینار منعقد کیا جارہا ہے۔ یہ پروگرام چتردرگہ کے پترکرترا بھون واقع ڈاکٹر بی۔آر۔امبیڈکر ہال میں ہوگا۔

اس موقع پر منصوبہ بندی، پروگرام رابطہ و شماریات کے وزیر اور ضلع چتردرگہ کے انچارج وزیر ڈی۔ سدھاکر افتتاحی تقریب انجام دیں گے۔ کرناٹک میڈیا اکیڈمی کی صدر محترمہ عائشہ خانم نے بتایا کہ یہ سمینار ڈاکٹر بی۔آر۔امبیڈکر کے انقلابی نظریات، ان کی آج کے دور میں معنویت، ان کی صحافتی خدمات اور ایک ہمہ گیر، مساوی اور سب کو ساتھ لے کر چلنے والے معاشرے کی تشکیل جیسے موضوعات پر غور و خوض کا اہم پلیٹ فارم ثابت ہوگا۔

سمینار میں سینئر صحافی ڈی۔ اماپتی کلیدی خطبہ پیش کریں گے۔ اس کے علاوہ وزیراعلیٰ کے میڈیا مشیر کے۔وی۔ پربھاکر، رکن پارلیمان گووند ایم۔ کارجول اور دیگر معزز شخصیات بھی شریک ہوں گی۔

پروگرام میں مختلف مقالے بھی پیش کیے جائیں گے، جن میں این۔ روی کمار: "امبیڈکر کی صحافتی زندگی"، وی۔ایل۔ نرسمہا مورتی: "امبیڈکر کی تحریریں بحیثیت صحافی"، ڈاکٹر بھارتی دیوی: "امبیڈکر کے نظریات میں صنفی مساوات"، اور رشیکیش بہادر دیسائی: "صحافیوں میں سماجی انصاف کا شعور" جیسے موضوعات شامل ہیں۔ اختتامی خطاب سینئر صحافی سنت کمار بیلاگلی کریں گے۔

کرناٹک میڈیا اکیڈمی کی سکریٹری سہانا ایم نے اعلان کیا کہ اس سمینار میں صحافیوں کے ساتھ ساتھ عام دلچسپی رکھنے والے افراد بھی شرکت کرسکتے ہیں۔