بنگلورو، 27 جولائی (ایس او نیوز/ایجنسی)محکمہ موسمیات بنگلورو نے ریاست کرناٹک کے لیے 27 جولائی سے 2 اگست 2025 تک موسمی الرٹ جاری کیا ہے، جس کے تحت ریاست کے مختلف علاقوں میں آئندہ سات دنوں کے دوران وقفے وقفے سے شدید بارش اور تیز ہوائیں چلنے کا امکان ظاہر کیا گیا ہے۔
محکمہ کے مطابق، مدھیہ پردیش کے شمال مغربی علاقوں اور اس کے آس پاس ایک کم دباؤ کا نظام بنا ہوا ہے، جو مغرب کی طرف بڑھتے ہوئے آئندہ 12 گھنٹوں میں کمزور پڑ سکتا ہے، تاہم اس کا اثر کرناٹک کے موسم پر نمایاں رہے گا۔
ساحلی کرناٹک میں شدید بارش کا انتباہ
محکمہ کی رپورٹ کے مطابق ساحلی اضلاع اُڈپی، دکشن کنڑا اور اُتر کنڑا میں 27 تا 29 جولائی کے درمیان کچھ مقامات پر شدید سے بہت شدید بارش ہونے کا امکان ہے۔ جبکہ 30 جولائی سے 2 اگست کے درمیان ان علاقوں میں ہلکی تا درمیانی بارشیں متوقع ہیں۔ ان دنوں تیز ہوائیں بھی چل سکتی ہیں جن کی رفتار 40 سے 50 کلومیٹر فی گھنٹہ تک ہو سکتی ہے۔
شمالی اندرونی کرناٹک میں بھی بارشیں جاری رہیں گی
شمالی اندرونی کرناٹک کے اضلاع بیدر، بیلگاوی، کلبرگی، کوپل، رائچور، وجےپور، یادگیر اور دیگر مقامات پر 27 تا 29 جولائی کے دوران ہلکی تا درمیانی بارشیں اور تیز ہوائیں چلنے کا امکان ظاہر کیا گیا ہے، جبکہ 30 جولائی کے بعد بارشوں میں کمی واقع ہو سکتی ہے۔
جنوبی اندرونی کرناٹک میں کچھ مقامات پر شدید بارش کا امکان
جنوبی کرناٹک کے کورگ، ہاسن، چکمگلورو اور شیموگہ اضلاع میں 27 تا 30 جولائی کے دوران کچھ علاقوں میں شدید بارش ہو سکتی ہے۔ جبکہ بنگلورو شہری و دیہی، میسورو، منڈیا، ٹمکور، داونگیرے، رام نگرم، چترادرگہ، کولار اور چکبالاپور میں اس دوران ہلکی تا درمیانی بارشیں جاری رہنے کی توقع ہے۔
بنگلورو کے لیے خصوصی پیش گوئی
محکمہ موسمیات کی طرف سے بنگلورو شہر کے لیے جاری کردہ خصوصی پیش گوئی کے مطابق آئندہ 48 گھنٹوں کے دوران شہر اور اس کے اطراف مطلع ابر آلود رہے گا اور ہلکی تا درمیانی بارش متوقع ہے۔ اس دوران ہوا کی رفتار 40 سے 50 کلومیٹر فی گھنٹہ تک ہو سکتی ہے، جب کہ زیادہ سے زیادہ درجہ حرارت 27 ڈگری اور کم سے کم درجہ حرارت 20 ڈگری سینٹی گریڈ رہنے کا امکان ہے۔
عوام سے احتیاط برتنے کی اپیل
محکمہ موسمیات کے سینئر سائنسدان ڈاکٹر این. پویاراسن نے عوام سے اپیل کی ہے کہ وہ خراب موسم کے پیش نظر غیر ضروری سفر سے گریز کریں، نشیبی علاقوں میں احتیاط برتیں اور کسی بھی ہنگامی صورتحال میں مقامی انتظامیہ کی ہدایات پر عمل کریں۔