بیدر، 2 اگست (ایس او نیوز/ایجنسی) کرناٹک کے وزیر جنگلات، ماحولیات، حیاتیاتی تنوع اور ضلع بیدر کے انچارج وزیر ایشور بی کھنڈرے نے معاشرے کو نشہ سے پاک بنانے کی ضرورت پر زور دیتے ہوئے کہا ہے کہ منشیات کے خلاف جدوجہد میں ہر فرد کو اپنا کردار ادا کرنا چاہیے تاکہ ایک صحت مند اور باوقار سماج کی تعمیر ممکن ہو۔

وہ بیدر شہر کے پوجیہ چنّابسوا پٹّدیو رنگ مندر میں مہانت شیویوگی جی کے یومِ پیدائش کے موقع پر منعقدہ "نشہ سے پاک دن" کی تقریب سے خطاب کر رہے تھے۔ وزیر موصوف نے کہا کہ ریاستی حکومت نے مہانت شیویوگی کے یومِ پیدائش کو "نشہ سے پاک دن" کے طور پر منانے کا فیصلہ کیا ہے تاکہ عوام میں منشیات کے خلاف بیداری پیدا کی جا سکے۔

ایشور کھنڈرے نے نشاندہی کی کہ آج کے نوجوان کم عمری میں ہی بری عادتوں کا شکار ہو رہے ہیں، جس کے پیش نظر انہیں ابتدا ہی سے منشیات اور نشہ آور اشیاء کے نقصانات سے آگاہ کرنا ضروری ہے۔ انہوں نے نوجوانوں کو مشورہ دیا کہ وہ سگریٹ، شراب اور دیگر نشہ آور اشیاء سے دور رہیں، صحت مند طرز زندگی اپنائیں، موبائل اور سوشل میڈیا کے غلط استعمال سے بچیں اور تعلیم، کھیل اور یوگا جیسے تعمیری مشاغل کو اپنی زندگی کا حصہ بنائیں۔

وزیر موصوف نے ماحولیات کے تحفظ کی طرف بھی توجہ دلائی اور عوام سے اپیل کی کہ زیادہ سے زیادہ درخت لگائیں، سبز مقامات کو فروغ دیں، پلاسٹک کے استعمال سے گریز کریں اور بیدر کو ’پلاسٹک فری ضلع‘ بنانے میں تعاون دیں۔

پروگرام کے دوران ممتاز ماہر نفسیات ڈاکٹر راگھویندر واگول نے منشیات کے مضر اثرات پر تفصیلی روشنی ڈالتے ہوئے کہا کہ منشیات دماغ اور اعصابی نظام کو بری طرح متاثر کرتی ہیں۔ انہوں نے کہا کہ نوجوان اکثر تجسس یا دوستوں کے دباؤ میں آ کر تمباکو، شراب، گانجا، ہیروئن، کوکین اور ایم ڈی ایم اے جیسی خطرناک اشیاء استعمال کرنا شروع کر دیتے ہیں، جو بعد میں ان کی عادت بن جاتی ہیں اور صحت کو شدید نقصان پہنچاتی ہیں۔

اس موقع پر اسکول و کالج طلبہ کے لیے مضمون نویسی کے مقابلے بھی منعقد کیے گئے، جن میں نمایاں کارکردگی دکھانے والے طلبہ کو انعامات سے نوازا گیا۔

تقریب میں ڈپٹی کمشنر شلپا شرما، محکمہ اطلاعات و عوامی رابطہ کے اسسٹنٹ ڈائریکٹر منجوناتھ سلوولّی، ٹرسٹ صدر راچپا ماشٹی، محکمہ تجارتی ٹیکس کے افسران مہیش ماشٹی اور پرشانت ماشٹی، کالج پرنسپل سوپنا ماشٹی، سابق پرنسپل شیوشنکر ٹوکرے، مورارجی کالج کے پرنسپل چنّابسوا ہیڈے اور وجے کرشنا سولاپور سمیت کئی معزز افراد شریک رہے۔