بنگلورو، 14 اگست (ایس او نیوز/ایجنسی) کرناٹک حکومت نے ریاستی دارالحکومت کی اہم سرکاری عمارتوں وِدھان سودھا اور وِکاس سودھا میں عوام کے داخلے کے عمل کو سہل بنانے کے لیے جدید آن لائن پاس سسٹم کا آغاز کر دیا ہے۔ اس سہولت کے تحت شہری اب گھر بیٹھے اپنے موبائل فون کے ذریعے داخلے کا پاس حاصل کر سکیں گے اور انہیں فزیکل پاس لینے کے لیے گوپال گوڈا سرکل یا دیوراج ارس مجسمہ کے قریب واقع استقبالیہ مراکز کا رخ نہیں کرنا پڑے گا۔
سرکاری اعلامیہ کے مطابق، درخواست دہندہ کو اپنے موبائل پر ’’کرناٹک ون‘‘ ایپ انسٹال کرنی ہوگی۔ ایپ میں وِدھان سودھا پاس سیکشن پر جا کر آن لائن فارم کھولا جا سکتا ہے۔ اس میں موبائل نمبر درج کرنے کے بعد OTP کے ذریعے تصدیق کی جائے گی، پھر نام، مطلوبہ عمارت، ملاقات کا مقصد، تاریخ، وقت اور شناختی دستاویزات کے ساتھ اپنی تصویر اپ لوڈ کرنی ہوگی۔
درخواست منظور ہونے پر موبائل پر ایک QR کوڈ موصول ہوگا، جسے مقررہ تاریخ اور وقت پر داخلے کے مقام پر تعینات پولیس اہلکاروں کو دکھانا ہوگا۔ اہلکار QR کوڈ اسکین کرنے اور شناختی دستاویز کی تصدیق کے بعد عمارت میں داخلے کی اجازت دیں گے۔
یہ نیا نظام شہریوں کے لیے داخلے کے عمل کو تیز، شفاف اور آسان بنانے کے لیے متعارف کرایا گیا ہے۔ البتہ کابینہ اجلاس کے دن اور سرکاری تعطیلات میں یہ سہولت دستیاب نہیں ہوگی۔ حکومت نے عوام سے اپیل کی ہے کہ وہ اس جدید آن لائن سہولت سے بھرپور فائدہ اٹھائیں تاکہ وِدھان سودھا اور وِکاس سودھا میں رسائی مزید سہل اور فوری ہو سکے۔