بنگلورو/کلبرگی، 31 مئی (ایس او نیوز/ایجنسی)کرناٹک قانون ساز کونسل میں اپوزیشن کے چیف وہپ اور بی جے پی رکن کونسل این روی کمار نے اعلان کیا ہے کہ وہ کلبرگی کی ڈپٹی کمشنر فوزیہ ترنم سے اپنے متنازع بیان پر تحریری معافی مانگیں گے۔ اُن کے خلاف کلبرگی کے اسٹیشن بازار پولیس اسٹیشن میں ایف آئی آر درج ہونے کے بعد، ہائی کورٹ نے انہیں ہدایت دی تھی کہ وہ تفتیشی اداروں سے مکمل تعاون کریں اور ڈپٹی کمشنر سے معذرت کریں۔

دی نیو انڈین ایکسپریس سے بات کرتے ہوئے روی کمار نے کہا، "میں عدلیہ کا بے حد احترام کرتا ہوں اور تفتیشی اداروں کے ساتھ مکمل تعاون کرتا ہوں۔ میں ایک یا دو دن میں اپنے وکیل کے ذریعے ڈی سی کو معذرت نامہ پیش کروں گا۔"

یہ تنازع اُس وقت سامنے آیا جب روی کمار نے 24 مئی کو کلبرگی میں بی جے پی کے احتجاج کے دوران الزام لگایا تھا کہ ڈپٹی کمشنر فوزیہ ترنم کانگریس کی ہدایات پر کام کر رہی ہیں۔ انہوں نے حد پار کرتے ہوئے یہ بھی کہا تھا کہ وہ "پاکستان سے آئی ہوئی لگتی ہیں"۔ ان ریمارکس پر سخت عوامی اور سیاسی ردعمل دیکھنے کو ملا۔

کانگریس کے جیوَرگی سے رکن اسمبلی ڈاکٹر اجے سنگھ نے اس بیان کی سخت الفاظ میں مذمت کرتے ہوئے کہا، "ڈپٹی کمشنر کا عہدہ ایک آئینی منصب ہے اور ہر شخص کو اس کا احترام کرنا چاہیے۔" انہوں نے گورنر تھاور چند گہلوٹ سے مطالبہ کیا کہ روی کمار کی قانون ساز کونسل کی رکنیت کو فوری طور پر منسوخ کیا جائے۔

یہ واقعہ ریاست میں بیوروکریسی اور سیاست کے درمیان بڑھتی ہوئی کشیدگی کی عکاسی کرتا ہے، خاص طور پر جب مسلم خاتون افسران کو نشانہ بنایا جائے۔ فوزیہ ترنم کے خلاف دیے گئے بیان کو فرقہ وارانہ نوعیت کا اور قابلِ مذمت قرار دیا گیا ہے، جس پر اب روی کمار نے معافی مانگنے کا فیصلہ کیا ہے۔