ಬೆಂಗಳೂರು: ರಾಜ್ಯದ 28 ಲೋಕಸಭಾ ಕ್ಷೇತ್ರಗಳ ಪೈಕಿ ಎಪ್ರಿಲ್ 26 ಹಾಗೂ ಮೇ 7ರಂದು ತಲಾ 14 ಕ್ಷೇತ್ರಗಳಿಗೆ ಎರಡು ಹಂತಗಳಲ್ಲಿ ಚುನಾವಣೆ ನಡೆಯಲಿದ್ದು, ಜೂನ್ 4ರಂದು ಫಲಿತಾಂಶ ಪ್ರಕಟವಾಗಲಿದೆ ಎಂದು ರಾಜ್ಯ ಮುಖ್ಯ ಚುನಾವಣಾಧಿಕಾರಿ ಮನೋಜ್ ಕುಮಾರ್ ಮೀನಾ ತಿಳಿಸಿದ್ದಾರೆ.

ಶನಿವಾರ ನಗರದ ಶೇಷಾದ್ರಿ ರಸ್ತೆಯಲ್ಲಿರುವ ರಾಜ್ಯ ಮುಖ್ಯ ಚುನಾವಣಾಧಿಕಾರಿ ಕಚೇರಿಯಲ್ಲಿ ಸುದ್ದಿಗೋಷ್ಠಿಯನ್ನುದ್ದೇಶಿಸಿ ಮಾತನಾಡಿದ ಅವರು, ರಾಜ್ಯದಲ್ಲಿ ಯುವ ಮತದಾರರು(18-19 ವೈಸ್ಸಿನವರು)-11,24,622, 85 ವರ್ಷಕ್ಕಿಂತ ಹಿರಿಯ ಮತದಾರರು-5,70,168, ದಿವ್ಯಾಂಗ ಮತದಾರರು-6,12,154, ಬುಡಕಟ್ಟು ಜನಾಂಗದ ಮತದಾರರು-38,794, ಅತಿ ಹೆಚ್ಚು ಮತದಾರರು ಇರುವ ಲೋಕಸಭಾ ಲೋಕಸಭಾ ಕ್ಷೇತ್ರ ಬೆಂಗಳೂರು ಉತ್ತರ (31,74,098 ಮತದಾರರು), ಅತಿ ಕಡಿಮೆ ಮತದಾರರು ಇರುವ ಲೋಕಸಭಾ ಕ್ಷೇತ್ರ ಉಡುಪಿ-ಚಿಕ್ಕಮಗಳೂರು(15,72,958 ಮತದಾರರು) ಎಂದು ತಿಳಿಸಿದರು. ಅತಿ ಹೆಚ್ಚು ಮತದಾರರು ಇರುವ ವಿಧಾನಸಭಾ ಕ್ಷೇತ್ರ ಬೆಂಗಳೂರು ದಕ್ಷಿಣ(7,33,313 ಮತದಾರರು), ಅತಿ ಕಡಿಮೆ ಮತದಾರರು ಇರುವ ವಿಧಾನಸಭಾ ಕ್ಷೇತ್ರ ಶೃಂಗೇರಿ(1,68,084 ಮತದಾರರು) ಎಂದು ಅವರು ತಿಳಿಸಿದರು. ಒಟ್ಟು 58,834 ಮತಗಟ್ಟೆಗಳಿವೆ. ಈ ಪೈಕಿ ನಗರ ಪ್ರದೇಶದಲ್ಲಿ 21,595 ಹಾಗೂ ಗ್ರಾಮೀಣ ಪ್ರದೇಶದಲ್ಲಿ 37,239 ಮತಗಟ್ಟೆಗಳಿವೆ.

ಅತಿ ಹೆಚ್ಚು ಮತದಾರರನ್ನು ಹೊಂದಿರುವ ಬೆಂಗಳೂರು ಉತ್ತರ ಕ್ಷೇತ್ರದಲ್ಲಿ 2,911 ಹಾಗೂ ಅತ್ಯಂತ ಕಡಿಮೆ ಮತದಾರರನ್ನು ಹೊಂದಿರುವ ಉಡುಪಿ-ಚಿಕ್ಕಮಗಳೂರು ಕ್ಷೇತ್ರದಲ್ಲಿ 1,842 ಮತಟ್ಟೆಗಳಿವೆ ಎಂದು ಮನೋಜ್ ಕುಮಾರ್ ಮೀನಾ ತಿಳಿಸಿದರು.

28 ಮಂದಿ ಚುನಾವಣಾಧಿಕಾರಿಗಳು, 259 ಮಂದಿ ಸಹಾಯಕ ಚುನಾವಣಾಧಿಕಾರಿಗಳನ್ನು ನೇಮಕ ಮಾಡಲಾಗಿದೆ. 1,10,946 ಬ್ಯಾಲೆಟ್ ಯೂನಿಟ್, 77,667 ಕಂಟ್ರೋಲ್ ಯೂನಿಟ್ ಹಾಗೂ 82,575 ವಿವಿ ಪ್ಯಾಟ್‌ಗಳನ್ನು ಸಿದ್ಧವಾಗಿರಿಸಿ ಕೊಳ್ಳಲಾಗಿದೆ. 2,357 ಕ್ಷಿಪತ್ರ ಪಡೆಗಳು, 2,669 ಸ್ಥಿರ ಕಣ್ಣಾವಲು ತಂಡಗಳು, 647 ವೀಡಿಯೊ ಕಣ್ಣಾವಲು ತಂಡಗಳು, 258 ಲೆಕ್ಕಪರಿಶೋಧಕ ತಂಡಗಳು ಹಾಗೂ 257 ವೀಡಿಯೊ ವೀಕ್ಷಣೆ ತಂಡಗಳು ಸಿದ್ದವಾಗಿವೆ ಎಂದು ಅವರು ಹೇಳಿದರು.

58,834 ಮತಗಟ್ಟೆ ಅಧಿಕಾರಿಗಳನ್ನು ನಿಯೋಜಿಸಲಾಗುವುದು. ಈ ಪೈಕಿ 1,120 ಮತಗಟ್ಟೆಗಳನ್ನು ಮಹಿಳೆಯರ ತಂಡಗಳು ನಿರ್ವಹಿಸಲಿವೆ. 224 ಮತಗಟ್ಟೆಗಳನ್ನು ದಿವ್ಯಾಂಗರು ನಿರ್ವಹಿಸಲಿದ್ದಾರೆ. 224 ಮತಗಟ್ಟೆಗಳನ್ನು ಯುವಕರು ನಿರ್ವಹಿಸಲಿದ್ದಾರೆ. 40 ಸಾಂಪ್ರದಾಯಿಕ ಮತಗಟ್ಟೆಗಳನ್ನು ಸ್ಥಾಪಿಸಲಾಗುವುದು. 200 ವಿಷಯಾಧಾರಿತ ಮತಗಟ್ಟೆಗಳು ಇರಲಿವೆ. ಒಟ್ಟು 1,808 ಮಾದರಿ ಮತಗಟ್ಟೆಗಳು ಇರಲಿವೆ ಎಂದು ಅವರು ಮಾಹಿತಿ ನೀಡಿದರು.

ಗಡಿ ಚೆಕ್‌ಪೋಸ್ಟ್: ನಮ್ಮ ರಾಜ್ಯಕ್ಕೆ ಹೊಂದಿ ಕೊಂಡಿರುವ ತೆಲಂಗಾಣ, ಆಂಧ್ರಪ್ರದೇಶ, ತಮಿಳುನಾಡು, ಕೇರಳ, ಗೋವಾ ಹಾಗೂ ಮಹಾರಾಷ್ಟ್ರ ರಾಜ್ಯಗಳಿಗೆ ಸಂಬಂಧಿಸಿದಂತೆ ಅಂತರ್‌ರಾಜ್ಯ ಗಡಿ ಚೆಕ್ ಪೋಸ್ಟ್‌ಗಳಿವೆ. ಇದರಲ್ಲಿ ಪೊಲೀಸ್ ಇಲಾಖೆಯ 172 ಹಾಗೂ ಅಬಕಾರಿ ಇಲಾಖೆಯ 40 ಚೆಕ್ ಪೋಸ್ಟ್‌ಗಳಿವೆ ಎಂದು ಮನೋಜ್ ಕುಮಾ‌ರ್ ಮೀನಾ ತಿಳಿಸಿದರು.

ರಾಯಭಾರಿಗಳು: ಕ್ರಿಕೆಟಿಗ ರಾಹುಲ್ ದ್ರಾವಿಡ್, ಜ್ಞಾನಪೀಠ ಪ್ರಶಸ್ತಿ ಪುರಸ್ಕೃತ ಸಾಹಿತಿ ಡಾ.ಚಂದ್ರಶೇಖರ ಕಂಬಾರ ಹಾಗೂ ಪ್ಯಾರಾ ಒಲಿಂಪಿಯನ್ ಕ್ರೀಡಾಪಟು ಗಿರೀಶ್ ಗೌಡ ಅವರನ್ನು ರಾಜ್ಯ ಚುನಾವಣಾ ರಾಯಭಾರಿಗಳನ್ನಾಗಿ ನೇಮಿಸಲಾಗಿದೆ ಎಂದು ಮನೋಜ್ ಕುಮಾರ್ ಮೀನಾ ಹೇಳಿದರು.

ಮತದಾರರ ಅನುಕೂಲಕ್ಕಾಗಿ ವೋಟರ್ ಹೆಲ್ಸ್ ಲೈನ್ ಅಪ್ಲಿಕೇಷನ್, ಚುನಾವಣಾ ಮಾದರಿ ನೀತಿ ಸಂಹಿತೆ ಉಲ್ಲಂಘನೆಗೆ ಸಂಬಂಧಿಸಿದ ಮಾಹಿತಿ ನೀಡಲು ಸಿವಿಜಿಲ್ ಅಪ್ಲಿಕೇಷನ್, ಅಭ್ಯರ್ಥಿಗಳ ಅನುಕೂಲಕ್ಕಾಗಿ ಸುವಿಧಾ ಆ್ಯಪ್, ದಿವ್ಯಾಂಗರಿಗಾಗಿ ಸಕ್ಷಮ್ ಆ್ಯಪ್, ಅಭ್ಯರ್ಥಿಗಳ ಬಗ್ಗೆ ತಿಳಿದುಕೊಳ್ಳಲು ಕೆವೈಸಿ ಆ್ಯಪ್, ಮತದಾನದ ಶೇಕಡಾವಾರು ಪ್ರಮಾಣ ಪ್ರದರ್ಶಿಸಲು ವೋಟ‌ರ್ ಟರ್ನ್‌ಔಟ್ ಆ್ಯಪ್ ಅನ್ನು ಅಭಿವೃದ್ಧಿಪಡಿಸಲಾಗಿದೆ ಎಂದು ಅವರು ತಿಳಿಸಿದರು.