ಜಾಗತಿಕ ಹಸಿವು ಸೂಚ್ಯಂಕ; 125 ದೇಶಗಳ ಪಟ್ಟಿಯಲ್ಲಿ ಭಾರತಕ್ಕೆ 111ನೇ ಸ್ಥಾನ; ಪಾಕಿಸ್ತಾನ, ಬಾಂಗ್ಲಾದೇಶ, ನೇಪಾಳ, ಲಂಕಾಗಿಂತಲೂ ಹಿಂದೆ ಬಿದ್ದ ಭಾರತ!
ಹೊಸದಿಲ್ಲಿ: ಗುರುವಾರ ಬಿಡುಗಡೆಗೊಂಡಿರುವ 2023ರ ಜಾಗತಿಕ ಹಸಿವು ಸೂಚ್ಯಂಕದಲ್ಲಿ, ಭಾರತವು 125 ದೇಶಗಳ ಪಟ್ಟಿಯಲ್ಲಿ 111ನೇ ಸ್ಥಾನದಲ್ಲಿದೆ.
ಸೊನ್ನೆಯಿಂದ 100 ಅಂಕಗಳ ಮಾಪಕದಲ್ಲಿ ಭಾರತವು 28.7 ಅಂಕಗಳನ್ನು ಗಳಿಸಿದೆ. ಈ ಮಾಪಕದಲ್ಲಿ ಸೊನ್ನೆ ಎಂದರೆ ಶ್ರೇಷ್ಠ ಅಂಕವಾಗಿದೆ (ಹಸಿವೆಯೇ ಇಲ್ಲ) ಮತ್ತು 100 ಎಂದರೆ ಅತ್ಯಂತ ಕೆಟ್ಟ ಪರಿಸ್ಥಿತಿ (ಹಸಿವೆಯಿಂದ ತೀವ್ರವಾಗಿ ಬಳಲುತ್ತಿರುವುದು)ಯಾಗಿದೆ.
ಸರಕಾರೇತರ ಸಂಘಟನೆಗಳಾದ 'ಕನ್ಸರ್ನ್ ವರ್ಲ್ಡ್ವೈಡ್' ಮತ್ತು 'ವೆಲ್ಡ್ ಹಂಗರ್ ಹಿಲ್ಲೆ ಗುರುವಾರ ಬಿಡುಗಡೆಗೊಳಿಸಿರುವ ಸೂಚ್ಯಂಕವು ಭಾರತದಲ್ಲಿ ಹಸಿವಿನ ತೀವ್ರತೆಯನ್ನು 'ಗಂಭೀರ'ದ ವರ್ಗಕ್ಕೆ ಸೇರಿಸಿದೆ.
ಸೋಜಿಗದ ಸಂಗತಿಯೆಂದರೆ, ಈ ಬಾರಿಯ ಹಸಿವು ಸೂಚ್ಯಂಕದಲ್ಲಿ ಭಾರತವು ಅಫ್ಘಾನಿಸ್ತಾನವನ್ನು ಹೊರತುಪಡಿಸಿ ಇತರೆಲ್ಲಾ ತನ್ನ ನೆರೆ ದೇಶಗಳಿಗಿಂತ ಹಿಂದುಳಿದಿದೆ. ಪಾಕಿಸ್ತಾನ 102ನೇ ಸ್ಥಾನದಲ್ಲಿದ್ದರೆ, ಬಾಂಗ್ಲಾದೇಶ 81, ನೇಪಾಳ 69 ಮತ್ತು ಶ್ರೀಲಂಕಾ 60ನೇ ಸ್ಥಾನಗಳಲ್ಲಿವೆ.
ಹಸಿವೆಯಲ್ಲಿ ಭಾರತಕ್ಕಿಂತಲೂ ಕಳಪೆ ಸಾಧನೆ ಮಾಡಿರುವ ದೇಶಗಳಲ್ಲಿ ಅಫ್ಘಾನಿಸ್ತಾನ, ಕೆರಿಬಿಯನ್ ದೇಶ ಹೈಟಿ ಮತ್ತು ಸಬ್ ಸಹಾರ ಆಫ್ರಿಕಾದ 12 ದೇಶಗಳು ಒಳಗೊಂಡಿವೆ.
ಜಾಗತಿಕ ಹಸಿವು ಸೂಚ್ಯಂಕವನ್ನು ನಾಲ್ಕು ಅಂಶಗಳನ್ನು ಆಧರಿಸಿ ಲೆಕ್ಕಹಾಕಲಾಗುತ್ತದೆ. ಅವುಗಳೆಂದರೆ ಅಪೌಷಿಕತೆ, ಎತ್ತರಕ್ಕೆ ತಕ್ಕಷ್ಟು ತೂಕವಿಲ್ಲದ ಐದು ವರ್ಷಕ್ಕಿಂತ ಕೆಳಗಿನ ಮಕ್ಕಳ ಪ್ರಮಾಣ, ಪ್ರಾಯಕ್ಕೆ ತಕ್ಕಷ್ಟು ಎತ್ತರವಿಲ್ಲದ ಐದು ವರ್ಷಕ್ಕಿಂತ ಕೆಳಗಿನ ಮಕ್ಕಳ ಪ್ರಮಾಣ ಮತ್ತು ಐದು ವರ್ಷಕ್ಕಿಂತ ಕೆಳಗಿನ ಮಕ್ಕಳ ಸಾವಿನ ದರ.
ಈ ಬಾರಿಯ ವರದಿಯನ್ನು 2000, 2008 ಮತ್ತು 2015ರ ವರದಿಗಳೊಂದಿಗೆ ಮಾತ್ರ ಹೋಲಿಸಬಹುದಾಗಿದೆ ಎಂದು ಸಮೀಕ್ಷೆ ನಡೆಸಿರುವ ಸಂಸ್ಥೆಗಳು ಹೇಳಿವೆ. ಯಾಕೆಂದರೆ ಅಂಕಿಅಂಶಗಳನ್ನು ಪ್ರತಿವರ್ಷ ಪರಿಷ್ಕರಿಸಲಾಗುತ್ತದೆ ಮತ್ತು ಪಟ್ಟಿಯಲ್ಲಿ ಬರುವ ದೇಶಗಳು ಬದಲಾಗುತ್ತಿರುತ್ತವೆ ಎಂದು ಅದು ತಿಳಿಸಿದೆ.
2015ರಲ್ಲಿ ಭಾರತ 29.2 ಅಂಕಗಳನ್ನು ಗಳಿಸಿತ್ತು. ಅದಕ್ಕೆ ಹೋಲಿಸಿದರೆ, ಈ ಬಾರಿ 28.7 ಅಂಕಗಳೊಂದಿಗೆ ಭಾರತ ಕೊಂಚ ಪ್ರಗತಿ ಸಾಧಿಸಿದೆ. ಆದರೆ, 2008ರ 35.5 ಮತ್ತು 2000ದ 38.4 ಅಂಕಗಳಿಗೆ ಹೋಲಿಸಿದರೆ, ಈ ಬಾರಿಯ ಪ್ರಗತಿ ಗಣನೀಯವಾಗಿದೆ.