ಧಾರವಾಡ: ಸಾರ್ವತ್ರಿಕ ಚುನಾವಣೆ ಮತದಾನದಿಂದ ಯಾರೂ ಸಹ ಹೊರಗುಳಿಯದೆ ಪ್ರತಿಯೊಬ್ಬರೂ ತಪ್ಪದೇ ಮತದಾನ ಮಾಡಲು ಭಾರತ ಚುನಾವಣಾ ಆಯೋಗದಿಂದ ಸೌಲಭ್ಯ ಕಲ್ಪಿಸಲಾಗಿದೆ. ವಿಶೇಷವಾಗಿ ದೃಷ್ಟಿದೋಷವುಳ್ಳವರು ಸೇರಿದಂತೆ ಇತರ ವಿಕಲಚೇತನರು ಮತದಾನ ಕೇಂದ್ರಕ್ಕೆ ಬಂದು ಮತದಾನ ಮಾಡಲು ಅನುಕೂಲವಾಗುವಂತೆ ಅಗತ್ಯ ಸಿದ್ಧತೆ ಮಾಡಿಕೊಳ್ಳಲಾಗಿದೆ ಎಂದು ಸಹಾಯಕ ಮತದಾರ ನೊಂದಣಿ ಅಧಿಕಾರಿಯಾಗಿರುವ ತಹಶೀಲ್ದಾರ ಪ್ರಕಾಶ ಕುದರಿ ಹೇಳಿದರು.
ಅವರು ಇಂದು ಬೆಳಿಗ್ಗೆ ಜಿಲ್ಲಾ ಪಂಚಾಯತ್ ಸಭಾಭವನದಲ್ಲಿ ಜಿಲ್ಲಾ ವಿಕಲಚೇತನರ ಕಲ್ಯಾಣ ಇಲಾಖೆ, ಸಮರ್ಥನಂ ಟ್ರಸ್ಟ್, ಸಹನಾ ಚಾರಿಟೇಬಲ್ ಟ್ರಸ್ಟ್ ಹಾಗೂ ತಾಲೂಕಾ ಸ್ವಿಪ್ ಸಮಿತಿ ಸಹಯೋಗದಲ್ಲಿ ದೃಷ್ಟಿದೋಷವುಳ್ಳ ಮತದಾರರಿಗೆ ಆಯೋಜಿಸಿದ್ದ ಮತದಾನ ಪ್ರಾತ್ಯಕ್ಷಿಕೆ ಕಾರ್ಯಕ್ರಮ ಉದ್ದೆಶಿಸಿ ಮಾತನಾಡಿದರು.

ಧಾರವಾಡ ಜಿಲ್ಲೆಯಲ್ಲಿ ಸುಮಾರು ೧೩,೦೨೯ ಜನ ವಿವಿಧ ರೀತಿಯ ವಿಕಲಚೇತನರು ಮತದಾನಕ್ಕೆ ಅರ್ಹತೆ ಪಡೆದಿದ್ದಾರೆ. ಮತದಾನ ಕೇಂದ್ರಕ್ಕೆ ಬಂದು ಮತ ಚಲಾಯಿಸಿ ಮರಳಿ ಮನೆಗೆ ಹೋಗಲು ವಾಹನ ವ್ಯವಸ್ಥೆ, ಮತದಾನ ಕೇಂದ್ರದಲ್ಲಿ ರ‍್ಯಾಂಪ್, ವ್ಹಿಲ್‌ಚೇರ್, ಮತದಾನ ಯಂತ್ರದಲ್ಲಿ ಬ್ರೆöÊಲ್‌ಲಿಪಿ ಸೌಲಭ್ಯ ಕಲ್ಪಿಸಲು ಸಿದ್ಧತೆ ಮಾಡಿಕೊಳ್ಳಲಾಗಿದೆ. ವಿಕಲಚೇತನರು ಮತದಾನ ಮಾಡಲು ನೆರವಿಗಾಗಿ ಓರ್ವ ಸಹಾಯಕನನ್ನು ಹೊಂದಲು ಅವಕಾಶವಿದೆ. ಆಯ್ಕೆ ಮಾಡಿಕೊಳ್ಳುವ ಸಹಾಯಕ ೧೮ ವರ್ಷ ಮೇಲ್ಪಟ್ಟವನಾಗಿರಬೇಕು. ಮತ್ತು ಆ ಸಹಾಯಕ ಒಬ್ಬ ವಿಕಲಚೇತನರಿಗೆ ಮಾತ್ರ ನೆರವು ನೀಡಬೇಕು ಎಂದು ಹೇಳಿದರು.

ಕಾರ್ಯಕ್ರಮದಲ್ಲಿ ಜಿಲ್ಲಾ ಪಂಚಾಯತ್ ಉಪಕಾರ್ಯದರ್ಶಿ ಎ.ಎಂ. ಪಾಟೀಲ, ವಿಕಲ ಚೇತನರ ಕಲ್ಯಾಣ ಅಧಿಕಾರಿ ಅಮರನಾಥ ಹಾಗೂ ಸೆಕ್ಟರ್ ಅಧಿಕಾರಿ ಎಂ.ಎಚ್. ವಾಗದ ಅವರು ಮಾತನಾಡಿದರು. ಪ್ರಾತ್ಯಕ್ಷಿಕೆಯಲ್ಲಿ ದೃಷ್ಟಿದೋಷವುಳ್ಳ ಮತದಾರರಿಗೆ ಮತಯಂತ್ರ, ಮತಖಾತ್ರಿ ಯಂತ್ರದ ಬಳಕೆ ವಿಧಾನಗಳನ್ನು ವಿವರಿಸಿ ಸ್ವತ: ಪ್ರಾಯೋಗಿಕವಾಗಿ ಅಣಕು ಮತದಾನ ಮಾಡಲು ಅವಕಾಶ ಕಲ್ಪಿಸಲಾಯಿತು. ವಿಕಲಚೇತನರು ಈ ಕಾರ್ಯಕ್ರಮದಿಂದ ತಮ್ಮಲ್ಲಿ ಆತ್ಮವಿಶ್ವಾಸ ಮೂಡಿತು ಎಂದು ಹರ್ಷ ವ್ಯಕ್ತಪಡಿಸಿದರು. ೨೦೦ ಕ್ಕೂ ಹೆಚ್ಚು ವಿಕಲಚೇತನರು ಭಾಗವಹಿಸಿದ್ದರು.