بنگلورو، 10؍ ستمبر (ایس او نیوز/ایجنسی) وزیراعلیٰ سدارامیا کی صدارت میں آج ان کی سرکاری رہائش گاہ "کرشنا" پر ریاست کی مختلف رہائشی اسکیموں کی پیش رفت کا جائزہ اجلاس منعقد ہوا، جس میں جاری منصوبوں اور ان کے مالیاتی امور پر تفصیلی بحث کی گئی۔

اجلاس میں بتایا گیا کہ پردھان منتری آواس یوجنا (اربن) کے تحت گزشتہ حکومت میں 43,874 مکانات سمیت کل 47,848 مکانات منظور کیے گئے تھے۔ ان میں سے 13,303 مکانات تقریباً مکمل ہو چکے ہیں جبکہ 25,815 مکانات پر تعمیراتی کام جاری ہے۔ اب تک مستفیدین کی جانب سے 134 کروڑ روپے جمع کیے گئے ہیں، تاہم ابتدائی مرحلے کے 7,900 مکانات کی تقسیم کے لیے 216 کروڑ روپے کی رقم بقایا ہے۔

وزیراعلیٰ نے متعلقہ حکام کو ہدایت دی کہ بقایا فنڈز کے اجرا کے لیے فوری تجاویز پیش کی جائیں اور ہڈکو سے قرض لینے جیسے متبادل پر بھی غور کیا جائے تاکہ مکانات کی تقسیم میں مزید تاخیر نہ ہو۔

اسی طرح اجلاس میں بتایا گیا کہ سلم بورڈ کے تحت 42 ہزار مکانات کی تعمیر جاری ہے۔ ان منصوبوں کے لیے سڑکوں اور دیگر بنیادی سہولتوں کی فراہمی کے مقصد سے خصوصی فنڈ مختص کیا جائے گا۔ اس کے علاوہ امبیڈکر رہائشی منصوبہ (دیہی) کے لیے موجودہ بجٹ میں 900 کروڑ روپے کی گنجائش رکھی گئی ہے، جس کے تحت 94,939 مکانات کی تعمیر کی جا رہی ہے۔ ان میں سے 56,682 مکانات پر اس وقت کام جاری ہے۔

وزیراعلیٰ نے مالیات محکمہ کو سختی سے ہدایت دی کہ تمام زیر تعمیر مکانات کی بروقت تکمیل کو یقینی بنانے کے لیے ضروری فنڈز کے اجرا سے متعلق فوری سفارشات پیش کی جائیں۔