بنگلورو، 30 جولائی (ایس او نیوز / ایجنسی)وزیراعلیٰ کرناٹک سدارامیا نے آج ودھان سودھا، بنگلورو میں ضلع میسورو کی ترقیاتی صورتحال کا تفصیلی جائزہ لینے کے لیے ایک خصوصی اجلاس کی صدارت کی۔ اس اجلاس میں ضلع کے نگران وزیر، متعلقہ وزراء اور ارکانِ اسمبلی نے شرکت کی۔ اجلاس میں ضلع میں جاری ترقیاتی منصوبوں، زرعی سرگرمیوں اور بجٹ کے مؤثر استعمال پر تفصیلی تبادلہ خیال کیا گیا۔
وزیراعلیٰ نے تمام جاری منصوبوں کی بروقت تکمیل کو حکومت کی اولین ترجیح قرار دیا اور افسران کو ہدایت دی کہ ہر حلقے میں کاموں کی مقررہ مدت کے اندر تکمیل کو یقینی بنایا جائے۔ انہوں نے اضلاع وار اور محکموں کے لحاظ سے مختص بجٹ کی تفصیلات طلب کرتے ہوئے بجٹ میں شامل اسکیموں کی پیش رفت پر بھی رپورٹ طلب کی۔
اجلاس کے دوران سدارامیا نے ارکانِ اسمبلی کو مشورہ دیا کہ وہ اپنے حلقہ انتخاب کی بنیادی ضروریات کو مدنظر رکھتے ہوئے ترقیاتی تجاویز پیش کریں، تاکہ عوامی مسائل کا مؤثر حل نکالا جا سکے۔ انہوں نے زور دیا کہ ارکانِ اسمبلی کے ترقیاتی فنڈز کا استعمال مکمل شفافیت اور عوامی مفاد میں کیا جائے۔
وزیراعلیٰ نے ریاستی حکومت کی طرف سے جاری کردہ "گارنٹی اسکیموں" کی ستائش کرتے ہوئے کہا کہ ان اسکیموں نے میسورو ضلع کی معیشت کو مستحکم بنانے میں اہم کردار ادا کیا ہے۔ اجلاس میں موجود ارکان اسمبلی نے بھی ان اسکیموں کے مثبت اثرات کو اجاگر کیا۔
سدارامیا نے بتایا کہ ریاستی حکومت ہر اسمبلی حلقے میں ایک ہزار کروڑ روپے سے زائد کے ترقیاتی کام انجام دے رہی ہے، جس کا براہِ راست فائدہ عوام کو ملنا چاہیے۔ انہوں نے وزراء اور ارکان اسمبلی کو تاکید کی کہ وہ عوام سے مسلسل رابطے میں رہیں اور ان کے مسائل کو ترجیحی بنیادوں پر حل کریں۔
مزید برآں، وزیراعلیٰ نے کہا کہ ضلعی ترقیاتی منصوبہ بندی (KDP) کے اجلاس میں وزراء اور ارکانِ اسمبلی کی بامعنی شرکت نہایت ضروری ہے۔ انہوں نے ہدایت دی کہ ان اجلاسوں میں عوامی مسائل، ترقیاتی کاموں میں پیش آنے والی تکنیکی رکاوٹیں، افسران کی غفلت یا تاخیر جیسے امور پر کھل کر گفتگو کی جائے تاکہ بروقت اور مناسب حل نکالا جا سکے۔